Ռուս խաղաղապահները Լեռնային Ղարաբաղում իրականացրել են դիտակետերի վերադասավորումներ
Լեռնային Ղարաբաղի հակամարտության գոտում ռուս խաղաղապահներն իրականացրել են դիտակետերի վերադասավորումներ, ինչպես նաև փոխել դրանց թվաքանակը։ Այս մասին չորեքշաբթի՝ նոյեմբերի 18-ին տեղի ունեցած ճեպազրույցի ժամանակ հայտարարել է Ռուսաստանի պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը։
«Հաշվի առնելով ստեղծված իրավիճակը՝ ռուսական զորախմբի հրամանատարության կողմից հստակեցվել են դիտակետերի տեղադրությունը և կազմը։ Խաղաղապահ գործողության անցկացման շրջանում խաղաղապահ ստորաբաժանումների կողմից իրադրության շուրջօրյա մոնիթորինգ եւ հրադադարի ռեժիմի պահպանման վերահսկողություն է իրականացվում 23 դիտակետերում: Հյուսիսային պատասխանատվության գոտում ծավալվել է 11 դիտակետ, իսկ հարավային պատասխանատվության գոտում՝ 12»,- հայտարարել է Կոնաշենկովը։
Ավելի վաղ, ռուսական խաղաղապահ առաքելությունը Լեռնային Ղարաբաղում ծավալել էր 25 դիտակետ. 9-ական պատասխանատվության գոտու հյուսիսային և հարավային հատվածներում և ժամանակավորապես ևս 7-ը՝ Լաչինի միջանցքում։ Կոնաշենկովն ընդգծել է, որ ՌԴ խաղաղապահ առաքելության ստորաբաժանումները շարունակում են Լեռնային Ղարաբաղում իրականացնել մշտադիտարկում և հրադադարի պահպանման շուրջօրյա վերահսկողություն։
Բացի այդ, շարունակվում է նաև խաղաղապահ առաքելության անձնակազմի, տեխնիկայի և գույքի տեղափոխումը ՌԴ օդատրանսպորտային ուժերի միջոցով։ Նոյեմբերի 10-ից ի վեր իրականացվել է 184 թռիչք, որից 22-ը միայն վերջին մեկ օրվա ընթացքում։
Մեկնաբանել