Ռուս սահմանապահները հավելյալ ուժեր կտեղակայեն Հայաստանի և Ադրբեջանի սահմանին
Ռուսաստանի Անվտանգության դաշնային ծառայության սահմանապահ ծառայությունը հավելյալ ուժեր կտեղակայի Հայաստանի և Ադրբեջանի սահմանին։ Այդ մասին ՌԴ նախագահ Վլադիմիր Պուտինի հետ տեղի ունեցած խորհրդակցության ժամանակ հայտարարել է ՌԴ Անվտանգության դաշնային ծառայության տնօրեն Ալեքսանդր Բորտնիկովը։
«Հայաստանի Հանրապետության սահմանային անվտանգության ապահովման, Լեռնային Ղարաբաղում խաղաղության ապահովման նպատակով ընդունված որոշման համաձայն և հայկական կողմի խնդրանքով, Անվտագության դաշնային ծառայության սահմանապահների վարչությանը Հայաստանի Հանրապետությունում հատկացվել են հավելյալ պահեստային ուժեր՝ 188 զինծառայողներից կազմված անձնակազմ և անհրաժեշտ քանակությամբ տեխնիկա: Սահմանապահները հավելյալ ուժեր կտեղակայեն Հայաստանի և Ադրբեջանի սահմանին և Տեղ ու Սըղըրթ բնակավայրերում կազմակերպված դիտակետերում»,- հայտնել է ՌԴ ԱԴԾ ղեկավարը։
Բորտնիկովը նաև ընդգծել է, որ ադրբեջանական կողմն արդեն իսկ տեղեկացվել է այդ մասին և կազմակերպվել է անհրաժեշտ փոխգործակցությունը գործընկերների հետ։
Նա հայտնել է, որ նոյեմբերի 18-20-ն ընկած ժամանակահատվածում իրականացվել է պահեստային ուժերի տեղափոխում Հայաստան: Ըստ նրա՝ նոյեմբերի 22-ին պահեստային ուժերը կավարտեն պատասխանատվության գոտի տեղափոխումը և կանցնեն դրված խնդիրների իրականացմանը։
Բորտնիկովը Պուտինին նաև հայտնել է, որ Ռուսաստանի, Ադրբեջանի և Հայաստանի սահմանապահների միջև սուր հարցեր չեն առաջանում։ «Տեղի է ունենում տեղեկատվության մշտական փոխանակում։ Հիմա որևէ սուր հարց չի առաջանում»,- նշել է Բորտնիկովը։
Լուսանկարը՝ РИА Новости / Игорь Зарембо
Մեկնաբանել