«Ժառանգության» առաջնորդ Րաֆֆի Հովհաննիսյանը մեծամասնական ընտրակարգում միասնական թեկնածուներ ունենալու համար ընդդիմությանն առաջարկ էր արել: ՀԱԿ-ը մերժել էր, իսկ ՀՅԴ-ից ասել էին, որ դա ժամանակավրեպ է, և այդ հարցը թող մնա գրանցումներից հետո:

Սակայն երեկ ՀՅԴ պատգամավոր Լիլիթ Գալստյանը Aravot.am-ի հետ զրույցում ճիշտ հակառակ տեսակետը հայտնեց. «Դա ինքնին քաղաքական լավ առաջարկություն էր, բայց մի քիչ ուշացած: Կարծում եմ՝ եթե այդ առաջարկություններն ունենային մինչև առաջադրումները, ճիշտ կլիներ»:

Երբ Aravot.am-ը հիշեցրեց, որ Դաշնակցությունն ինքն էր հորդորել սպասել մինչև գրանցումները, Լիլիթ Գալստյանն ասաց, որ դա իր անձնական կարծիքն է. «Դա լավ գաղափար է, բայց պետք է ընդհակառակը՝ մի քիչ շուտ լիներ, որովհետև լուրջ մարդիկ առաջադրվում են, մեկ էլ ասում են՝ նրան այստեղից հանիր և այլն: Ողջունելի առաջարկություն էր, տրամաբանական և շահեկան ընդդիմադիր դաշտի համար: Թերևս, կարելի էր մի քիչ ավելի շուտ անել»: