Կփոխհատուցվեն Արցախի վերահսկողությունից դուրս մնացած համայնքների բնակիչներին հյուրընկալած անձանց ծախսերը
Կառավարությունը կփոխհատուցի Արցախի վերահսկողությունից դուրս մնացած համայնքների բնակիչներին հյուրընկալած անձանց ծախսերը։ Վեցամսյա աջակցությունը կտրամադրվի 2020 թվականի դեկտեմբեր, 2021 թվականի հունվար-մայիս ամիսների համար կացարան տրամադրող անձանց։ Այս մասին որոշումն ընդունվեց Կառավարության դեկտեմբերի 3-ի նիստում։
Սոցիալական աջակցությունը կտրամադրվի ամեն ամիս դրամական օգնության ձևով՝ յուրաքանչյուր հյուրընկալված քաղաքացու համար 30 000 դրամ, եթե հյուրընկալի կացարանը Հայաստանում է, և 45 000 դրամ, եթե հյուրընկալի կացարանը Արցախում է։
«Նշված գումարները չեն համարվելու՝ որպես վարձակալության գումար, այսինքն՝ անհատույց են տրամադրվելու և հարկման ենթակա չեն»,- հայտնեց Աշխատանքի և սոցիալական հարցերի նախարար Մեսրոպ Առաքելյանը:
Միջոցառման շրջանակում հյուրընկալ է համարվում այն ֆիզիկական անձը, ում Հայաստանում կամ Արցախի վերահսկողության ներքո գտնվող բնակավայրերում սեփականության իրավունքով (այդ թվում՝ համատեղ կամ բաժնային) պատկանում է բնակելի անշարժ գույք։
Հյուրընկալվող չի համարվում Հայաստանում կամ Արցախի վերահսկողության ներքո գտնվող բնակավայրերում սեփականության (այդ թվում՝ համատեղ կամ բաժնային) իրավունքով բնակելի անշարժ գույք ունեցող քաղաքացին։
Միջոցառումից օգտվելու համար դիմումը պետք է ներկայացվի էլեկտրոնային եղանակով.
- 2020 թվականի դեկտեմբեր ամսվա համար՝ դեկտեմբերի 25-ից մինչև 2021 թվականի հունվարի 12-ը ներառյալ,
- 2021 թվականի հունվար-մայիս ամիսների համար՝ յուրաքանչյուր ամսվա 25-ից մինչև հաջորդ ամսվա 5-ը ներառյալ։
Դիմումին պետք է կցվի նաև հյուրընկալվողի անձը հաստատող փաստաթղթի լուսապատճենը:
Մեկ հյուրընկալվողի համար սոցիալական աջակցությունը տրամադրվում է ամսական միայն մեկ անգամ: Ընդ որում` սոցիալական աջակցության տրամադրումը դադարեցվում է, եթե հյուրընկալվողը ներկայացնում է աջակցության տրամադրման դադարեցման դիմում՝ կացարանի տրամադրումը դադարելու հիմքով կամ Արցախի կառավարության կողմից հյուրընկալվողի՝ Արցախում մշտական բնակություն հաստատելու տեղեկության դեպքում։
Մեկնաբանություններ (1)
Մեկնաբանել