Ստամբուլի ոստիկանության դեպարտամենտը երեք օրով երկարաձգել է Ռուսաստանի երկու քաղաքացիների և Թուրքիայի մեկ քաղաքացու կալանավորումը, որոնք դեկտեմբերի 3-ին ձերբակալվել էին անօրինական նկարահանումների կասկածանքով։ Այդ մասին գրում է «Deutsche Welle»-ն՝ հղում անելով Ստամբուլի քաղաքային իշխանություններին։

Նրանց վարկածով՝ կալանավորվածներն առանց հատուկ թույլտվության նկարահանումներ են իրականացրել անօդաչու թռչող սարքեր արտադրող ընկերության մոտ, որտեղ ֆոտո և տեսանկարահանումներն արգելված են։

Ինչպես նշել է ռուսական НТВ հեռուստաընկերության մամուլի ծառայությունը, խոսքը «Центральное телевидение» հաղորդաշարի թղթակից Ալեքսեյ Պետրուշկոյի և օպերատոր Իվան Մալիշկինի մասին, ինչպես նաև Թուրքիայի քաղաքացի հանդիսացող մեկ անձի մասին, որն ուղեկցել է ռուս լրագրողներին։

Լրագրողների հետ կապն ընդհատվել է դեկտեմբերի 3-ին։ Նրանք այդ ժամանակ գտնվում էին Ստամբուլի արվարձաններից մեկում, որտեղ և ձերբակալվել են։ Դեկտեմբերի 3-ին, Մոսկվայի ժամանակով 21:00-ին Պետրուշկոն կարողացել է կարճ հաղորդագրություն ուղարկել։ «Մեզ, չգիտես ինչու, դեռ պահում են»,- հաղորդագրությունը մեջբերել է հեռուստաընկերության մամուլի ծառայությունը։ Դրանից հետո նրանք կապ չեն հաստատել հեռուստաընկերության հետ և չեն պատասխանել հեռախոսազանգերին և հաղորդագրություններին։

ՌԴ ԱԳՆ տարածած հաղորդագրության մեջ նշվում էր, որ Անկարայում Ռուսաստանի դեսպանությունը և Ստամբուլում ռուսական գլխավոր հյուպատոսությունը կապի մեջ են թուրքական իշխանությունների հետ և ճշտում են հնարավոր ձերաբակալության վերաբերյալ տեղեկատվությունը։

«Центральное телевидение» հաղորդաշարի վարող, НТВ հեռուստաընկերության գլխավոր պրոդյուսերի տեղակալ Վադիմ Տակմենևը նշել է, որ Պետրուշկոն և Մալիշկինը հեռուստաընկերության հաստիքային աշխատակիցներ են, որոնք մշտապես բնակվել են Ռուսաստանում։ Լրագրողները Թուրքիա էին մեկնել մի քանի ռեպորտաժ պատրաստելու համար, այդ թվում՝ Թուրքիայում ամանորյա հանգստի մասին։ «Այնտեղ ինչ-որ թյուրիմացություն է տեղի ունեցել… Հիմա դրանով զբաղվում է ԱԳՆ-ն, Թուրքիայում ռուսական գլխավոր հյուպատոսությունը»,- հայտարարել է նա։

ТАСС գործակալությունն էլ, հղում անելով Թուրքիայի ԱԳՆ իր աղբյուրներին, հայտնել է, որ հեռուստաընկերության աշխատակիցները ձերբակալվել են այն շրջանում, որտեղ գտնվում է մարտական անօդաչուներ արտադրող Baykar Savunma ընկերությունը։ Այն զբաղվում է նաև Bayraktar TB2 անօդաչուների արտադրությամբ, որոնք լայնորեն կիրառվում են Թուրքիայի զինված ուժերում։ Bayraktar TB2 անօդաչուները կիրառվել են նաև Ադրբեջանի կողմից Արցախում պատերազմական վերջին գործողությունների ժամանակ։

Լուսանկարը՝ Reuters գործակալության