![](/static/articles/12/52/12/l-u0ls83dRo6.jpg)
Սակրավորներն ականազերծել են Ստեփանակերտի տարածքի կեսից ավելին
Անցնող մեկ շաբաթվա ընթացքում սակրավորները պայթյունավտանգ առարկաներից մաքրել են Ստեփանակերտի և նրա հարակից տեղանքների տարածքների կեսից ավելին։ Այդ մասին РИА Новости գործակալությանը հայտնել է Արցախի հումանիտար ականազերծման կենտրոնի տնօրեն Սամվել Մեսրոպյանը՝ հավելելով, որ աշխատում են այդ տարածքներում ականազերծումն ավարտել մինչև ընթացիկ տարվա ավարտը։
«Մաքրվել է Ստեփանակերտ քաղաքի կեսից ավելին։ Հիմա կոնկրետ հեկտարներով չեմ կարող ասել, սակայն կեսից ավելին մաքրվել է։ Հիմա աշխատում ենք քաղաքին հարակից տարածքներում»,- նշել է Մեսրոպյանը։
Նրա խոսքերով՝ ներկայում Ստեփանակերտի կենտրոնական հատվածն ամբողջությամբ մաքրված է զինամթերքից, որոնք քաղաքի վրա են ընկել Արցախում պատերազմական գործողությունների ժամանակ։
«Մաքրվել է մասնավոր տարածքների կեսից ավելին։ Այստեղ խիտ բնակեցված շրջան է, անհրաժեշտ է մաքրել, քանի որ մարդիկ արդեն վերադառնում են»,- հավելել է Մեսրոպյանը։
Պատասխանելով այն հարցին, թե բացի Ստեփանակերտից, էլ որ շրջաններում է նախատեսվում իրականացնել ականազերծման աշխատանքներ, Մեսրոպյանը նշել է, որ Ստեփանակերտից հետո ականազերծման աշխատանքները կսկսվեն Մարտունու շրջանում, իսկ դրանից հետո՝ Մարտակերտում։
Հիշեցնենք, որ նոյեմբերի 9-ի երեկոյան Հայաստանի, Ադրբեջանի և Ռուսաստանի ղեկավարների ստորագրած հայտարարությամբ՝ Արցախում մարտական գործողությունները դադարեցվել են։ Համաձայն այդ փաստաթղթի՝ հայկական կողմը մինչև դեկտեմբերի 1-ը Ադրբեջանին հանձնեց Քելբաջարի, Աղդամի և Լաչինի շրջանները։
Լեռնային Ղարաբաղում շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորախումբը:
Լաչինի միջանցքը (5 կմ լայնությամբ), որն ապահովում է Արցախի կապը Հայաստանի հետ՝ ընդ որում շրջանցելով Շուշի քաղաքը, մնացել է Ռուսաստանի խաղաղապահ զորակազմի վերահսկողության ներքո:
Լուսանկարը՝ РИА Новости / Максим Блинов
Մեկնաբանել