![](/static/articles/12/52/15/l-STmnwTwlLY.jpg)
ԱՊՀ գագաթնաժողովը կանցկացվի առցանց ռեժիմով
ԱՊՀ գագաթնաժողովը, որը կայանալու էր 2020 թվականի դեկտեմբերի 18-ին, կանցկացվի առցանց ռեժիմով։ РИА Новости-ի փոխանցմամբ՝ այդ մասին հայտնել է ՌԴ նախագահի մամուլի քարտուղար Դմիտրի Պեսկովը՝ պատասխանելով համապատասխան հարցին:
Այս տարի ԱՊՀ-ում նախագահում է Ուզբեկստանը: Գագաթնաժողովից առաջ կկայանա ԱՊՀ արտաքին գործերի նախարարների խորհուրդը։ Հինգշաբթի՝ դեկտեմբերի 10-ին, նրանք կքննարկեն ինտեգրման հարցերը՝ շեշտը դնելով կորոնավիրուսի հետևանքների հաղթահարմանն ուղղված միացյալ գործողությունների իրականացման վրա։ Բացի այդ, արտաքին գործերի նախարարները կքննարկեն մի շարք փաստաթղթեր, որոնք հաստատման դեպքում, կներառվեն դեկտեմբերի 18-ին ԱՊՀ երկրների ղեկավարների խորհրդի օրակարգում։
«Հանդիպման ընթացքում տեղի կունենա կարծիքների փոխանակում Համագործակցության շրջանակներում ձեռք բերված արդյունքների և փոխգործակցության նոր առաջնահերթությունների, միջազգային և տարածաշրջանային խնդիրների վերաբերյալ, ինչպես նաև կկայանա ԱՊՀ պետությունների ղեկավարների խորհրդի առաջիկա նիստում ստորագրվելիք փաստաթղթերի նախագծերի քննարկում»,- նշվում է տարածված հաղորդագրության մեջ։
Ինչպես նշել է ՌԴ արտաքին գործերի նախարարությունը, առցանց քննարկմանը կմասնակցեն Ադրբեջանի, Հայաստանի, Բելառուսի, Ղազախստանի, Ղրղզստանի, Մոլդովայի, Ռուսաստանի, Տաջիկստանի և Թուրքմենստանի արտաքին գերատեսչական մարմինների ղեկավարները, ինչպես նաև Գործադիր կոմիտեի նախագահ, ԱՊՀ գործադիր քարտուղար Սերգեյ Լեբեդևը։
Լուսանկարը՝ ԱՊՀ պաշտոնական կայք էջի
Մեկնաբանել