Շրջակա միջավայրի նախարար Ռոմանոս Պետրոսյանի պաշտոնավարումից սկսած՝ զբաղեցրած պաշտոններից ազատվել է նախարարության 8 աշխատակից՝ իր դիմումի համաձայն և 1 աշխատակից՝ պաշտոնավարման ժամկետը լրանալու կապակացությամբ։ Նույն ժամանակահատվածում ՇՄՆ աշխատանքի է ընդունվել 13 քաղաքացի։ Այս մասին մեր գրավոր հարցմանն ի պատասխան հայտնել է ՇՄՆ գլխավոր քարտուղար Գ․Գուլյանը։

Ռոմանոս Պետրոսյանը շրջակա միջավայրի նախարար  նշանակվեց այս տարվա հուլիսի 30-ին: Հիշեցնենք, որ նախարարության կազմում գործող «Արգելոցապարկային համալիր» ՊՈԱԿ-ի տնօրեն Լևոն Գաբրիելյանը նոյեմբերի 1-ին հեռացվել էր աշխատանքից, տնօրենի պնդմամբ, նախարարի թիմակիցը չլինելու և նախարարի պաշտոնավարման սկզբից ինքնակամ ազատման դիմումներ գրելու հորդորներին չանսալու համար։ 

Լևոն Գաբրիելյանը դատական կարգով վիճարկում է իր նկատմամբ սահմանված կարգապահական տույժը, նաև նոր տույժի և հեռացման հրամանները վիճարկող հայցադիմում է նախապատրաստում։

• «Արգելոցապարկային համալիր» ՊՈԱԿ-ի տնօրենն ընդդեմ շրջակա միջավայրի նախարար Ռոմանոս Պետրոսյանի

Լևոն Գաբրիելյանին աշխատանքից ազատման, ինչպես նաև նախարարությունից այլ անձանց աշխատանքից ազատվելու վերաբերյալ հարցումով դիմել էինք նախարարին։ Նախարարությունը, պատասխանելով մեր գրավոր հարցմանը, հայտնել է, որ «Արգելոցապարկային համալիր» ՊՈԱԿ-ի տնօրենին աշխատանքից ազատելու որոշումը կայացվել է վերջինիս կողմից աշխատանքային, կարգապահական և ընթացակարգային մի շարք էական բացթողումների և խախտումների պատճառով։ Իսկ նրա փոխարեն նշանակված պամանակավոր պաշտոնակատար Պ․Պողոսյանը 2020թ․ դեկտեմբերի 1-ին ազատված չի եղել զբաղեցրած պաշտոնից։

«Դեկտեմբերի 1-ին Լ․Գաբրիելյանն ազատվել է «Արգելոցապարկային համալիր» ՊՈԱԿ-ի տնօրենի պաշտոնից։ Ղեկավարվելով «Պետական ոչ ատևտրային կազմակերպությունների մասին» օրենքի 15-րդ հոդվածի 6-րդ մասով, վարչապետի 2018թ․ հունիսի 11-ի N 745-Լ որոշման հավելվածի 18-րդ կետի 20-րդ ենթակեով և հիմք ընդունելով շրջակա միջավայրի նախարարի տեղակալ Ա․ Մազմանյանի զեկուցագիրը՝ ՇՄ նախարար Ռ․ Պետրոսյանի հրամանով, ՇՄՆ «Արգելոցապարկային համալիր» ՊՈԱԿ-ի տնօրենի պարտականությունների կատարումը 2020թ․ դեկտեմբերի 1-ից, ժամանակավորապես, մինչև օրենքով սահմանված կարգով հիմքի վերացումը, դրվել է նույն կազմակերպության տնօրենի տեղակալ պահպանության գծով-պահպանության բաժնի պետ Պ․Պողոսյանի վրա»,-պատասխանել է նախարարության ներկայացուցիչը։

 «Պետական ոչ ատևտրային կազմակերպությունների մասին» օրենքի 15-րդ հոդվածի 6-րդ մասը սահմանում է, որ պետական կազմակերպության գործադիր մարմնի պաշտոնում նշանակված կամ ընտրության արդյունքում գործադիր մարմնի պաշտոնում նշանակված անձի բացակայության դեպքում նրան նշանակած մարմնի գրավոր որոշման համաձայն այդ լիազորություններն իրականացնում է այլ անձ:

Հունիսի 11-ի N 745-Լ որոշման (որը բնապահպանության նախարարության կանոնադրության հաստատումն է վարչապետի կողմից) հավելվածի 18-րդ կետի 20-րդ ենթակետն էլ սահմանում է, որ նախարարը կասեցնում կամ ուժը կորցրած է ճանաչում ենթակա մարմինների, կազմակերպությունների և հիմնարկների ղեկավարների՝ Հայաստանի Հանրապետության օրենսդրության պահանջներին հակասող հրամանները, հրահանգները, կարգադրությունները, ցուցումները և հանձնարարականները։