Բա չի վախենո՞ւմ, որ գործից կհանեն

Կոտայքի մարզպետ Կավալենկո Շահգալդյանը կտրականապես հերքում է այս փուլում շրջանառվող այն խոսակցությունները, թե չարաշահելով իր պաշտոնեական դիրքը, ու դեռ նախընտրական քարոզչության պաշտոնական շրջանը չմեկնարկած, քարոզչություն է անում ՀՀԿ օգտին` ճնշում գործադրելով պետական հաստատությունների աշխատակիցների վրա:

Կառավարության երեկվա արտագնա նիստից հետո, որն անցկացվեց Կոտայքի մարզում, մարզպետը թեև փորձում էր անտեսանելի մնալ լրագրողների համար, սակայն նրան չհաջողվեց խուսափել «Հայացք»-ի թղթակցի հարցերից:

Պարոն Շահգալդյան, շատ են խոսակցություններն այն մասին, որ Դուք անգամ դպրոցներում ՀՀԿ օգտին նախընտրական քարոզչություն եք անում` խախտելով օրենքը:

Կարելի է շատ բան ասել, բայց թե այդ ասածներից որն է համապատասխանում իրականությանը, դուք ինքներդ պիտի պարզեք: Դպրոցներում այսպիսի գործընթաց չի արվում, մենք քարոզչություն դեռևս չենք սկսել: Մենք իհարկե արդեն ձևավորել ենք համապատասխան քարոզչական կենտրոններ, շտաբներ, որոնք քարոզչության սկզբից կսկսեն գործել: Էս պահի դրությամբ նախապատրաստական աշխատանքներ են իրականացվում, որ մենք ապրիլի 8-ից արդեն պատրաստ լինենք լայն մասշտաբով իրականացնելու Հանրապետական կուսակցության քարոզչությունը:

ՀՀԿ կողմից ընտրակաշառքներ բաժանելու մասին խոսակցություններ կան տարբեր մարզերում:

Մեր երկրում արդեն զարմանալի չէ, որ ոչնչից ինչ-որ բան են ուզում ստեղծել: Բայց բնության մեջ այդպիսի բան չկա` ոչնչից ոչ մի բան չի ստեղծվում: Կլինեն դեպքեր` էն ժամանակ կարձագանքենք, ի ցույց կդնենք, էսօր դրանք ուղղակի բամբասանքների ոլորտի խոսակցություններ են:

Արարատի մարզպետն օրերս մեզ ասաց, որ վերահսկելու է, որպեսզի իր մարզում ոչ միայն ՀՀԿ-ն, այլև մյուս կուսակցություններն էլ կաշառքներ չբաժանեն: Դուք նման վերահսկողություն սահմանելո՞ւ եք և ինչպե՞ս:

Վերահսկողություն անպատճառ իրականացվելու է, և՛ իրավապահ մարմինների, կողմից, և՛ մեր շտաբների աշխատակիցների կողմից վերահսկվելու է:

Ռ. Հովհաննիսյան