«Իմ քայլը» խմբակցության պատգամավորներ Նազելի Բաղդասարյանը և Սոֆիա Հովսեփյանը դեկտեմբերի 17-ից 19-ը գործուղվել են Արցախ:

Այսօր՝ դեկտեմբերի 22-ին, խորհրդարանում հրավիրված ասուլիսին պատգամավորներն ամփոփեցին այցը՝ խոսելով Հադրութի շրջանի Խծաբերդ գյուղում շրջափակման մեջ հայտնված, ապա գերեվարված անձանց մասին:

«Նախորդող օրերին տեղեկություն է տարածվել, որ մի խումբ քաղաքացիներ Հին Շեն և Մեծ Շեն գյուղերի հատվածում (Շուշիի շրջան) գտնվում են շրջափակման մեջ և Խծաբերդից (Հադրութի շրջան) մի խումբ գերեվարվել է: Դա է պատճառը, որ դեկտեմբերի 17-ին մեկնեցինք Արցախ, որ հասկանանք՝ ինչով կարող ենք օգտակար լինել։ Ամենատարբեր մակարդակներում հանդիպումներ ունեցանք՝ նախագահի, Անվտանգության խորհրդի քարտուղարի, Մարդու իրավունքների պաշտպանի հետ: Հանդիպում ունեցել ենք նաև ՊԲ հրամանատարության  հետ»,- ասաց Նազելի Բաղդասարյանը:

Հիշեցնենք, որ Խծաբերդ համայնքը մնացել էր հայկական ուժերի վերահսկողության տակ, սակայն դեկտեմբերի 12-ին Ադրբեջանը հարձակում էր սկսել Հադրութի շրջանի Հին Թաղլար և Խծաբերդ համայնքների ուղղությամբ:

Պատգամավորի խոսքով՝ հնարավոր է եղել Հին Շեն և Մեծ Շեն համայնքների հատվածներում իրականացնել մարտական հերթափոխ: ՊԲ-ի հետ ունենալով որոշակի համաձայնություն՝ Լիսագորի հատվածով պատգամավորները հասել են «վիճելի համարվող դիրքեր», հանդիպում ունեցել հերթափոխը վերջացրած 72 քաղաքացիների հետ, համոզվել, որ ճանապարհն անվտանգ է, և վերջիններիս ճանապարհել Շիրակի մարզ:

Սոֆիա Հովսեփյանը հավելեց, որ Խծաբերդի հատվածում գերեվարված 62 անձանց հարազատներից որոշներն իրենց հետ են եղել: Գերեվարվածների հարցով հանդիպել են պատասխանատու գերատեսչությունների հետ, այդ թվում՝ ռուսական կողմի հրամանատարության հետ:

Խաղաղապահ զորախմբի հրամանատար Ռուստամ Մուրադովին ներկայացվել է 62 անձանց տվյալները՝ նույնականացնելու համար: Մուրադովի վստահեցմամբ՝ գերիների կյանքին և առողջությանը որևէ վտանգ չի սպառնում: Մոտ ապագայում կիրականացվի նրանց վերադարձը հայրենիք: Սպասվում է նաև ավելի վաղ շրջանում գերեվարված անձանց վերադարձը, պատգամավորները, սակայն, որևէ թիվ չհայտնեցին, ասելով, որ իրավասու չեն այդ մասին խոսել: Ադրբեջանը հայտնել է Խծաբերդի հավածում 62 անձի գերեվարելու փաստի մասին, սակայն վերջիններիս տվյալները դեռ չեն նույնականացվել:

Սոֆիա Հովսեփյանի խոսքով՝ առանց որևէ խոչընդոտի իրենք հասել են Շուշիի շրջանի Հին Շեն և Մեծ Շեն բնակավայրեր, տեղացիները հայտնել են, որ Հին Շենում շուրջ 40 ընտանիք է բնակվում, անվտանգության որևէ խնդիր չկա: Գյուղի սկզբնամասում տեղակայված են եղել նաև ռուսական զորախմբի ներկայացուցիչներ:

«Մի փոքր մտահոգիչ էր Մեծ Շեն համայնքում բնակիչների չլինելու փաստը, երկու հոգի կար էնտեղ, հավանաբար կապված է նրանով, որ մինչ Հին Շենում խաղաղապահներ չկային: Այդ հարցը մոտ ապագայում, կարծում եմ, կկարգավորվի: Մեզ տեղեկացրին, որ ադ ճանապարհահատվածի վրա՝ գյուղամեջ տանող ճանապարհին, օրեր առաջ հայտնվել է մոտ 30 ադրբեջանցի: Ռուսական խաղաղապահների միջնորդությամբ նրանք բացել են ճանապարհը»,- ասաց Սոֆիա Հովսեփյանը՝ ընդգծելով, որ այս պահին Մեծ Շենում այդքան էլ ապահով չէ, և թերևս դա է պատճառը, որ գյուղի բնակիչները չեն վերադարձել իրենց համայնք:

Պատգամավորները նաև հանդիպել են Արցախի աշխատանքի, սոցիալական և բնակարանային հարցերի նախարար Մանե Թանդիլյանին և վերջինիս հետ քննարկել տարբեր հարցեր, այդ թվում՝ անօթևան դարձած արցախցիների բնակարանային կացության, անձնագրային հաշվառումների և այլ հարցեր:

Պատգամավորներն այս շաբաթվա վերջում կրկին մեկնելու են Արցախ: