Ազգային ժողովի «Իմ քայլը» խմբակցության պատգամավորներ Արտակ Մանուկյանն ու Նարեկ Զեյնալյանն առաջարկում են ընդլայնել նախկին ԽՍՀՄ Խնայբանկի ՀԽՍՀ հանրապետական բանկում ներդրված ավանդների դիմաց փոխհատուցման ծրագրի շահառուների թիվը:

2021 թվականի պետական բյուջեի մասին օրենքով սահմանված կարգով շարունակվելու է  «ՎՏԲ-Հայաստան բանկ» ՓԲԸ-ում ավանդատու հանդիսացող քաղաքացիների՝ որպես նախկին ԽՍՀՄ Խնայբանկի ՀԽՍՀ հանրապետական բանկում մինչև 1993 թվականի հունիսի 10-ը ներդրված դրամական ավանդների դիմաց փոխհատուցման միջոցառումը:

Պատգամավորներն առաջարկում են ծրագրի շահառու դիտարկել նաև Հայաստանի Հանրապետության պաշտպանության մարտական գործողությունների մասնակից ինչպես նաև մարտական գործողությունների հետևանքով չօգտագործվող և հակառակորդի կողմից հողատարածքների գնդակոծման դեպքեր ունեցող` Հայաստանի սահմանամերձ համայնքներում 2014 թվականի օգոստոսի 1-ի դրությամբ հաշվառված անձանց:

Նախագծի հիմնավորման մեջ նշվում է, որ հաշվի առնելով 2020 թվականին Ադրբեջանի և Թուրքիայի սանձազերձած պատերազմական գործողությունները, որոնք էական ազդեցություն են ունեցել Հայաստանի Հանրապետության բնակչության սոցիալական վիճակի վրա, առաջարկվում է ընդլայնել ԽՍՀՄ Խնայբանկի ՀԽՍՀ հանրապետական  բանկում ներդրած ավանդների փոխհատուցման հնարավորություն ունեցող շահառուների ցանկը:

Ըստ նախագծի հեղինակների՝ ընդունման դեպքում ակնկալվում է թիրախային համայքներում հաշվառված շահառուներին ապահովել ավանդների փոխհատուցման հնարավորությամբ՝ միաժամանակ նպատակ ունենալով բարելավել  թիրախային համայնքների բնակիչների ընդհանուր  սոցիալական վիճակը:

Նախագիծը շրջանառության է դրվել դեկտեմբերի 29-ին: Հիշեցնենք, որ այն օրենքի ուժ ստանալու համար պետք է ստանա ԱԺ գլխադասային հանձնաժողովի եզրակացությունը, ապա ընդունվի լիագումար նիստում: