Սպիտակ տան 6 աշխատակիցներ վաղաժամկետ հրաժարական են տվել այն բանից հետո, երբ հունվարի 6-ին գործող նախագահ Դոնալդ Թրամփի աջակիցները գրոհով վերցրել էին Կապիտոլիումը, որտեղ Կոնգրեսի երկու պալատների անդամները միացյալ նիստի ժամանակ հաստատում էին 2020 թվականի նոյեմբերին կայացած նախագահական ընտրությունների արդյունքները և Դեմոկրատական կուսակցության թեկնածու Ջո Բայդենի հաղթանակը։

Հրաժարականի մասին առաջինը հայտարարել է ԱՄՆ առաջին տիկին Մելանյա Թրամփի վարչակազմի ղեկավար Սթեֆանի Գրիշեմը, որը նախկինում զբաղեցրել է նաև Սպիտակ տան մամուլի ծառայության ղեկավարի պաշտոնը։ Թվիթերյան միկրոբլոգում կատարած գրառման մեջ, Գրիշեմը հրաժեշտ է տվել Մելանյա Թրամփին։ Սթեֆանին Թրամփի հետ աշխատել է 2015 թվականից։ Նրանք միասին են սկսել նախընտրական քարոզարշավը։

It has been an honor to serve the country in the @WhiteHouse . I am very proud to have been a part of @FLOTUS @MELANIATRUMP mission to help children everywhere, & proud of the many accomplishments of this Administration. Signing off now - you can find me at @OMGrisham ❤️??

— Stephanie Grisham (@StephGrisham45) January 7, 2021

Գրիշեմը չի նշել հրաժարականի պատճառը, սակայն The Hill-ը գրում է, որ նման քայլի նա գնացել է նախօրեին Վաշինգտոնում տեղի ունեցած անկարգությունների պատճառով։

The Hill-ը նաև գրում է, որ Սթեֆանի Գրիշեմից հետո, հրաժարականի դիմում են ներկայացրել նաև Սպիտակ տան մամլո քարտուղարի տեղակալ Սառա Մեթյուսը և Սպիտակ տան արարողակարգի ղեկավար Ռիկկի Նիսեթան։

Bloomberg-ի աղբյուրների տվյալներով՝ հունվարի 6-ի երեկոյան հրաժարական է տվել նաև ԱՄՆ նախագահի ազգային անվտանգության գծով խորհրդականի տեղակալ Մեթյու Փոթինջերը։ Փոթինջերի ղեկավարը՝ Թրամփի ազգային անվտանգության գծով խորհրդական Ռոբերտ Օ’Բրայենը կոնֆլիկտի մեջ է մտել նախագահի հետ՝ սատարելով փոխնախագահ Մայք Փենսին, որը պնդում էր, որ չպետք է ընդդիմանալ Կոնգրեսի որոշմանը։

I just spoke with Vice President Pence. He is a genuinely fine and decent man. He exhibited courage today as he did at the Capitol on 9/11 as a Congressman. I am proud to serve with him.

— Robert C. O'Brien (@robertcobrien) January 6, 2021

Bloomberg-ի տվյալներով՝ նա ևս մտադիր է հրաժարական ներկայացնել, սակայն Սպիտակ տան վարչակազմը փորձում է համոզել Օ’Բրայենին՝ մնալ աշխատակազմում։

NBC News-ը գրում է տրանսպորտի նախարար Էլեյն Չաոյի հրաժարականի մասին։ Չաոն հանրապետական սենատոր Միտչ Մաքքոնելի կինն է։ Թրամփի կուսակից Մաքքոնելին դեմ է արտահայտվել Դոնալդ Թրամփի տեսակետին՝ պնդելով, որ պետք է հաստատել Բայդենի հաղթանակը։ «Ընտրիչները, դատավորները, նահանգներն իրենց խոսքն ասել են։ Եթե մենք հիմա չեղարկենք նրանց որոշումները, դա մեծ հարված կլինի հանրապետությանը»,- Կոնգրեսում հայտարարել է Մաքքոնելին։

Դեմոկրատ Դևիդ Չիչիլինեն հրապարակել է նամակ, որտեղ առաջարկել է կիրառել ԱՄՆ Սահմանադրության 25-րդ փոփոխությունը, որով երկրի ղեկավարի իրավասությունները նախագահ Թրամփից, մինչ պաշտոնավարման ավարտը, կփոխանցվեն փոխնախագահ Մայք Փենսին։

NEW: I am sending a letter with @RepTedLieu and our colleagues on the House Judiciary Committee, calling on Vice President Pence to invoke the 25th Amendment to remove Donald Trump from office after today’s events. pic.twitter.com/5VK8DLTLn4

— David Cicilline (@davidcicilline) January 7, 2021

CBS-ի լրագրող Մարգարետ Բրենանը հայտնել է, որ այդ փոփոխությունը կարող է կիրառվել հենց վարչակազմի կողմից։

Հիշեցնենք, որ ԱՄՆ դեռևս գործող նախագահ Դոնալդ Թրամփի աջակիցները հունվարի 6-ին Վաշինգտոնում ներխուժել էին Կապիտոլիում, որտեղ ԱՄՆ Կոնգրեսը հաստատում էր 2020 թվականի նոյեմբերին կայացած նախագահական ընտրությունների արդյունքները։

Մինչ այդ ցուցարարները բախվել են ոստիկանների հետ, որոնք շրջափակել էին Կապիտոլիումը։ Ոստիկանական ուժերը ցուցարարներին փորձել են ցրել արցունքաբեր գազի միջոցով։ Բախումների արդյունքում զոհվել է 4 մարդ։ 

Ցուցարարների գործողությունների պատճառով ԱՄՆ Սենատի և Ներկայացուցիչների պալատի անդամները դադարեցրել էին աշխատանքը, ավելի ուշ, սակայն, նիստը շարունակվել է, և Կոնգրեսը հաստատել է Ջո Բայդենի հաղթանակը։ 

Լուսանկարում Սթեֆանի Գրիշեմը, Alex Wong/Getty Images