Եվրոպայի հայկական միությունների ֆորումի (ԵՀՄՖ) քարտուղարությունից հայտնում են, որ Սլովակիայի Գերագույն դատարանի նախագահ Շտեֆան Հարաբինի հրավերով պաշտոնական այցով Սլովակիա են ժամանել ՀՀ ՍԴ նախագահ Գագիկ Հարությունյանը և ՀՀ Վճռաբեկ դատարանի նախագահ Արման Մկրտումյանը:

Այսօր նրանք մասնակցելու են  Սլովակիայի Իրավաբանական ակադեմիայի կողմից կազմակերպված «Մարդկության դեմ հանցագործությունների իրավագիտական հարցերը» սեմինարին: Պարոն Գագիկ Հարությունյանը ներկայացնելու է Հայոց ցեղասպանության և ցեղասպանությունը քրեականացնող օրենքի հետ կապված մի շարք պարզաբանումներ: Վաղն` ապրիլի 3-ին, նրանց ընդունելու է  Սլովակիայի գլխավոր դատախազը: Հանդիպման ընթացքում կքննարկվեն Հայաստանի հետ կապերի հետագա զարգացումների հարցերը: Այնուհետև «Պան Եվրոպական իրավաբանական համալսարանի» կենտրոնական դահլիճում Վճռաբեկ դատարանի նախագահ պարոն Արման Մկրտումյանը ելույթ կունենա փաստաբանների և իրավաբան ուսանողների առջև «Հայաստանում նախատիպային արդարադատության կայացումը» թեմայով:

Պատվիրակությունը կմասնակցի Սլովակիայի Ազգային խորհրդի կողմից Հայոց ցեղասպանության բանաձևի ընդունման պատվին կառուցված խաչքար-հուշակոթողին ծաղկեպսակ մատուցելու արարողությանը:

Այցի վերջում նախատեսված է հանդիպում ԵՀՄՖ-ի նախագահ պարոն Աշոտ Գրիգորյանի գրասենյակում Հայաստանի հարցերով զբաղվող սլովակ հայտնի քաղաքական գործիչներ` նախկին վարչապետ Յան Չառնոգուրսկու, Ազգային խորհրդի առաջին նախագահ Ֆրանտիշեկ Միկլոշկոյի և Չեխոսլովակիայի նախկին գլխավոր դատախազ, Սլովակիայի գլխավոր դատախազի առաջին տեղակալ Մարտին Լաուկոի հետ: Կքննարկվեն հիմնականում Արցախի անկախության խնդիրները և դրան տանող ուղիների պարզաբանումը:

ԵՀՄՖ-ի մամլո քարտուղարություն

02.04.2012 թ.