Twitter-ի ղեկավար Ջեք Դորսին թվիթերյան գրառումների միջոցով կարծիք է արտահայտել ԱՄՆ դեռևս գործող նախագահ Դոնալդ Թրամփի օգտահաշվի արգելափակման վերաբերյալ։ 

I do not celebrate or feel pride in our having to ban @realDonaldTrump from Twitter, or how we got here. After a clear warning we’d take this action, we made a decision with the best information we had based on threats to physical safety both on and off Twitter. Was this correct?

— jack (@jack) January 14, 2021

Դորսին հայտարարել է, որ Թրամփի օգտահաշվի արգելափակումը ճիշտ որոշում էր։ Սոցիալական ցանցը որոշումն ընդունել է արտակարգ պայմաններում, ինչը կազմակերպությանն ստիպել է իր ջանքերը ներդնել հասարակական անվտանգության ապահովման գործընթացում։ «Վնասը, որն առցանց գրառումները կարող են առաջացնել ոչ առցանց պայմաններում, ակնհայտ են»,- ընդգծել է Դորսին։

Միևնույն ժամանակ, Դորսին նշել է, որ նման գործողությունները բաժանում են հանրությանը և ստեղծում վտանգավոր նախադեպ, որը ստիպում է մտածել այն մասին, թե առանձին մարդիկ և կորպորացիաներ ինչ իշխանություն կարող են ունենալ գլոբալ հանրային դիսկուրսի վրա։ 

Դորսին նաև նշել է, որ մի քանի սոցիալական ցանցերի որոշումն արգելափակել Թրամփի օգտահաշիվները, նախապես համաձայնեցված չի եղել։ «Ավելի շուտ, ընկերությունները եկել են այդպիսի եզրակացության կամ էլ ոգեշնչվել են մյուս ընկերությունների գործողություններից»,- հայտարարել է Դորսին։ 

Հիշեցնենք, որ հունվարի 6-ին Դոնալդ Թրամփի աջակիցները գրոհել էին Կապիտոլիումի վրա, որտեղ այդ ժամանակ ընթանում էր Կոնգրեսի երկու պալատների համատեղ նիստը։ Սենատի և Ներկայացուցիչների պալատի անդամները հաստատում էին 2020 թվականի նոյեմբերին կայացած նախագահական ընտրությունների արդյունքները։ Թրամփն անձամբ աջակիցներին կոչ էր արել շարժվել Կապիտոլիումի ուղղությամբ։ 

Դրանից հետո Facebook-ը, Instagram-ը և YouTube-ը, մինչև Թրամփի պաշտոնավարման ժամկետի ավարտը, արգելափակել էին նրա օգտահաշիվները, իսկ Twitter-ը որոշել է հավերժ արգելափակել այն։ Ընկերությունն այդ քայլը բացատրել է նրանով, որ Թրամփի գրառումները բռնություն են քարոզում, ինչից էլ ոգեշնչվում են աջ ծայրահեղականները։ ԱՄՆ գործող նախագահի օգտահաշիվների արգելափակման պատճառով՝ խոշոր սոցիալական ցանցերը մեղադրվում են գրաքննության մեջ։

Լուսանկարը՝ qz.com-ից