Ստեփանակերտի ականազերծման աշխատանքների ժամանակ ռուս սակրավորները հայտնաբերել են միջազգային իրավունքով արգելված M-85 կասետային զինամթերք։ Այդ մասին չորեքշաբթի՝ հունվարի 20-ին, «Российская газета» պարբերականին տված հարցազրույցում հայտարարել է ՌԴ զինված ուժերի ինժեներական զորքերի հրամանատար, գեներալ-լեյտենանտ Յուրի Ստավիցկին։  

«Տարբեր տեսակի ականադաշտեր են պատահում։ Ստեփանակերտում հիմա շատ կան չպայթած կասետային Մ-85 «Կոլոկոլչիկներ»,- նշել է Ստավիցկին։ Վերջինիս խոսքերով՝ ռուս սակրավորները Արցախի շրջաններում իրականացվող աշխատանքի ժամանակ հայտնաբերում են մեծ քանակությամբ լքված զինամթերք, ինչպես նաև չպայթած արկեր։ 

«Դժվարություններ առաջացան նաև վնասված գազատարների ուսումնասիրության ընթացքում, որոնք հնարավորինս շուտ պետք է վերականգնվեին․․․ խողովակների մոտ տանող ճանապարհին, սակրավորները հայտնաբերել են Ֆ-1 տեսակի ձեռքի բեկորային նռնակների կիրառմամբ տեղադրված «ձգապարաններ», չպայթած բազմաթիվ արկեր, ինչպես նաև չօգտագործված արկեր»,- հայտարարել է ՌԴ ինժեներական զորքերի հրամանատարը։

Նա նաև նշել է, որ գազատարի ականազերծման աշխատանքներին խանգարում են նաև եղանակային և աշխարհագրական պայմանները, քանի որ որոշ գազատարներ անցնում են ավելի քան 2000 մետր բարձրության պայմաններում։

ՌԴ պաշտպանության նախարարության տվյալներով՝ նոյեմբերի 23-ից սկսած ռուս ռազմական ինժեներները չպայթած զինամթերքից մաքրել են մոտ 551 հեկտար տարածք, 205,3 կիլոմետր ճանապարհ, 783 շինություն, այդ թվում սոցիալական նշանակության 25 օբյեկտներ։ Ընդհանուր առմամբ հայտնաբերվել և ոչնչացվել է մոտ 24 հազար պայթուցիկ սարք, որոնք ոչնչացվել են հատուկ ստեղծված հրաձգարանում։

Լուսանկարը՝ ՌԴ Պաշտպանության նախարարության