Մարդու իրավունքների եվրոպական դատարանը, քննելով «Վրաստանն ընդդեմ Ռուսաստանի (II)» գործը, համարել է, որ Ռուսաստանը չի կարող պատասխանատու համարվել այն իրադարձությունների համար, որոնք տեղի են ունեցել 2008 թվականին Հարավային Օսիայում և Աբխազիայում վրացի զինվորականների հարձակման հետմղման ժամանակ: Այդ մասին գրում է «Новая газета»-ն՝ հղում անելով ՄԻԵԴ պաշտոնական կայքում հրապարակված տվյալներին։

ՄԻԵԴ-ը հայտարարել է, որ Ռուսաստանը Հարավային Օսիայի նկատմամբ 2008 թվականի օգոստոսի 8-12-ը իրավազորություն չի ունեցել, քանի որ ընթացել են զինված բախումներ տարածքի նկատմամբ վերահսկողության համար։ «Ռուսաստանը պարտավոր էր հետաքննել այդ իրադարձությունները՝ միջազգային մարդասիրական իրավունքի և ներքին օրենսդրության նորմերի հիման վրա»,- նշել է ՄԻԵԴ-ը՝ հավելելով, որ արդար փոխհատուցումը պետք է որոշվի ավելի ուշ։ 

Դատարանը նշել է, որ չնայած մարտական գործողությունների ակտիվ փուլի ընթացքում տեղի ունեցած իրադարձությունները չեն եղել Ռուսաստանի իրավազորության ներքո, վերջինս դրանից հետո «արդյունավետ վերահսկողություն» է հաստատել այդ տարածքների նկատմամբ։ «Հաշվի առնելով, որ ռուս զինծառայողների շրջանում բոլոր պոտենցիալ կասկածյալները գտնվում են կամ Ռուսաստանի Դաշնությունում, կամ նրա վերահսկողության տակ գտնվող տարածքներում, Վրաստանին չի հաջողվել համարժեք և արդյունավետ հետաքննություն իրականացնել»,- նշվում է ՄԻԵԴ որոշման մեջ։

«Վրաստանն ընդդեմ Ռուսաստանի (II)» գործի առարկան 2008 թվականի օգոստոսին Աբխազիայում և Հարավային Օսիայում տեղի ունեցած իրադարձություններն ու դրանց հետևանքներն էին։ 2008 թվականի օգոստոսի 7-ի լույս 8-ի գիշերը Վրաստանի զինված ուժերը հարձակվել էին Հարավային Օսիայի վրա և մտել Ցխինվալ։ Փոխարենը Ռուսաստանը ևս իր զորքերը մտցրել էր Հարավային Օսիայի տարածք և 5 օրվա ընթացքում վրացական զորքերին դուրս մղել տարածաշրջանից։

Հակամարտության արդյունքում Ռուսաստանը ճանաչել էր Աբխազիայի և Հարավային Օսիայի անկախությունը, որոնք, ավելի վաղ, մտնում էին Վրաստանի կազմում։ Մարտական գործողությունների արդյունքում զոհվել էր ավելի քան 650 մարդ։

Լուսանկարը՝ Reuters գործակալության