Մեկնարկել է Դավոսի տնտեսական համաժողովը
Դավոսում երկուշաբթի՝ հունվարի 25-ին, մեկնարկել է ամենամյա տնտեսական համաժողովը, որն այս տարի կազմակերպվում է առցանց։ Համաժողովին մասնակցում են աշխարհի զարգացած և զարգացող երկրների մի շարք ղեկավարներ, այդ թվում՝ Գերմանիայի, Հնդկաստանի, Ռուսաստանի, Չինաստանի, Հարավային Կորեայի, Ֆրանսիայի, Հարավաֆրիկյան Հանրապետության և Ճապոնիայի առաջնորդները։ Համաժողովը կտևի մինչև հունվարի 29-ը, իսկ քննարկման գլխավոր թեման, ինչպես հայտարարել են կազմակերպիչները, կլինի «նոր գլոբալ իրավիճակի» քննարկումը, որը կապված է կորոնավիրուսի համավարակի հետ։
Ընդհանուր առմամբ, Դավոսի համաժողովին կմասնակցի մոտ 1500 մարդ 70 երկրից։ Բացի երկրների և կառավարությունների ղեկավարներից, առցանց համաժողովին մասնակցում են նաև միջազգային կազմակերպությունների, գործարար աշխարհի ներկայացուցիչներ և առաջատար փորձագետներ։ «Վստահության վերականգնումը և միջազգային համագործակցության ընդլայնումը բացառապես կարևոր են նորարարական և համարձակ լուծումների խթանման համար՝ համավարակի դադարեցման և կայուն վերականգնման աջակցության նպատակով»,- իր ելույթում հայտարարել է Համաշխարհային տնտեսական համաժողովի հիմնադիր և նախագահ Կլաուս Շվաբը, որն առցանց համաժողովն անվանել է «եզակի»։
Համաշխարհային բիզնեսի և քաղաքական գործիչների ամենամյա ավանդական հանդիպումը կազմակերպվում է յուրաքանչյուր հունվարի վերջ՝ Շվեյցարիայի Դավոս քաղաքում։ 2020 թվականի դեկտեմբերին Համաշխարհային տնտեսական համաժողովի ղեկավար կազմը հայտնել է, որ կորոնավիրուսի համավարակի հետ կապված, հնարավոր է, առաջիկա հանդիպումը կազմակերպվի 2021 թվականի մայիսի 13-16-ը, Սինգապուրում։
Լուսանկարը՝ AFP via Getty Images
Մեկնաբանել