Երևանի քաղաքապետ Տարոն Մարգարյանը 2012 թվականի շինբարեկարգման ծրագրով նախատեսված աշխատանքների ընթացքին ծանոթանալու նպատակով պարբերաբար շրջայցեր է կատարում մայրաքաղաքի վարչական շրջաններ: Այս համատեքստում հերթականը Էրեբունի վարչական շրջանն էր:

Տարոն Մարգարյանը նախ ծանոթացել է բակերում, հանգստի գոտիներում, այգիներում ու պուրակներում իրականացվող բարեկարգման ու կանաչապատման աշխատանքերին, զրուցել բնակիչների հետ, լսել առաջադրվող խնդիրներն ու պատասխանատուներին տեղում հանձնարարել հաշվի առնել բնակիչների առաջարկները և նրանց ևս մասնակից դարձնել վարչական շրջանում իրականացվող ծրագրերին:

Արցախի 8 հասցեի բակում քաղաքապետի այցելության պահին եզրաքարերի նորոգման աշխատանքներ էին ընթանում: Ամբողջությամբ բարեկարգվում և կանաչապատվում են Գուրգեն Մահարի 39 և Ազատամարտիկների 76 շենքերի բակերը: Այստեղ կտեղադրվեն նոր զրուցարաններ ու նստարաններ, իսկ փոքրիկների համար կկառուցվեն խաղահրապարակներ:

Բոլոր բնակիչներն ընդգծել են, որ բակերի բարեկարգումն առաջնահերթ խնդիր է: Տարոն Մարգարյանն էլ խոստացել է բակերի բարեկարգման ավարտից հետո կրկին այցելել ու բնակիչների հետ կատարել դրանց պաշտոնական բացումը: Վարչական շրջանի պատասխանատուները զեկուցել են, որ աշխատանքները կավարտվեն սահմանված ժամկետում:

Բարեկարգմանը զուգահեռ վարչական շրջանում նաև ասֆալտապատման աշխատանքներ են կատարվում: Քաղաքապետարանի ծրագրով հիմնանորոգվող Նոր Արեշ 44 փողոցում կատարվող աշխատանքներին տեղում հետևել է նաև Տարոն Մարգարյանն ու համոզվել, որ դրանք ընթանում են լայն թափով, և ավելի քան 30 տարի նորոգման կարիք ունեցող այս փողոցի բնակիչները ևս գոհ են աշխատանքից:

Քաղաքապետն այցելել է նաև վարչական շրջանի Մանկական այգի, որտեղ ընթանում են հիմնանորոգման աշխատանքներ: Այս այգու բարեկարգման խոստումը Տարոն Մարգարյանը բնակիչներին տվել էր նախորդ տարեվերջին այստեղ կազմակերպված ծառատունկի ժամանակ: Ըստ այդմ, ամբողջությամբ փոխվում, արդիականացվում է արտաքին լուսավորության ցանցը, բարեկարգվում և կանաչապատվում է այգու ողջ տարածքը: Այգին կունենա նաև ոռոգման նոր համակարգ:

«Այս այգին, ըստ էության, Էրեբունու բնակիչների ամենասիրված հանգստի գոտիներից մեկն է: Մոտ մեկ ամսից կավարտենք աշխատանքներն ու այգին կհանձնենք մեր բնակիչներին: Ամեն տարի մենք ավելացնում ենք բարեկարգվող բակային տարածքների թիվը: Եվս մի քանի տարի և բարեկարգ կլինեն մայրաքաղաքի բոլոր բակերը: Միայն այս տարվա ընթացքում ամեն վարչական շրջանում նախատեսել ենք բարեկարգել 20-30 բակ»,- նշել է Տարոն Մարգարյանը:

Երևանի քաղաքապետարանի տեղեկատվության և հասարակայնության հետ կապերի վարչության հաղորդմամբ՝ շրջայցից հետո քաղաքապետն աշխատանքային խորհրդակցություն է անցկացրել վարչական շրջանի աշխատակազմի հետ: