2012 թ. ՀՀ մարզերի հենակետային դպրոցներում մշակույթի նախարարության աջակցությամբ կկազմակերպվեն վարպետության դասեր արվեստի տարբեր մասնագիտությունների գծով: 2012 թ. 1-ին կիսամյակում հանրապետութայն առաջատար մասնագետները կայցելեն Շիրակի, Արագածոտնի, Լոռու, Գեղարքունիքի, Սյունիքի մարզեր և Արցախ, իսկ 2-րդ կիսամյակում՝ Տավուշի, Վայոց ձորի, Կոտայքի, Արմավիրի, Արարատի մարզեր:

Սկսած 2007 թ.-ից՝ մշակույթի նախարարության աջակցությամբ մարզերում կազմակերպվում են վարպետության դասեր արվեստի տարբեր մասնագիտությունների գծով, որոնց մասնագիտական ուղղվածությունը ձևավորվում է մարզերից ստացված հայտերի հիման վրա:

Վերջին 10-15 տարվա ընթացքում վերացել էր անմիջական շփումը մայրաքաղաքի լավագույն մասնագետների ու մարզային, համայնքային երաժշտական դպրոցների ուսուցիչների միջև: Դեռևս 2007 թ. երաժշտական տարբեր միջոցառումների՝ մրցույթների, փառատոների, մարզային համերգների ընթացքում բացահայտվել էին մասնագիտական բազմաթիվ թերացումներ հատկապես ՀՀ մարզերից ու համայնքներից ժամանած մասնակիցների մոտ: Այդ թերացումները շատ դեպքերում արդյունք էին ուսուցչի կիրառած ուսուցման և մեկնաբանման սխալ մեթոդիկայի:

Մարզերի ու համայնքների երաժշտական, արվեստի, գեղարվեստի և պարարվեստի դպրոցներում դասավանդման որակի որոշակի անկումը կանխելու նպատակով մշակույթի նախարարությունը նախաձեռնեց փորձի փոխանակման, վերապատրաստական աշխատանքների կազմակերպման համապատասխան քայլեր:

Վարպետության դասերի ծրագրավորված կազմակերպումը համագործակցության կամուրջ է հանրապետությունում կատարողական արվեստի և մանկավարժական մեծ փորձառություն ունեցող մասնագետների ու մարզերի դպրոցների մանկավարժների միջև, անհրաժեշտ գիտելիքների, աշխատանքային փորձի ու մասնագիտական հնարքների կենդանի փոխանցում:

Մշակույթի նախարարության տեղեկացմամբ՝ 2008-2011 թթ. ընթացքում «Վարպետության դասեր» ծրագրում ընդգրկվել է 1570 աշակերտ և 1730 մանկավարժ: