![](/static/articles/12/69/88/l-lZQ5Yv9NQX.jpg)
Ռուսաստանի ՀՆԱ-ն 2020 թվականին կրճատվել է 3,1 %-ով
Ռուսաստանի Դաշնության համախառն ներքին արդյունքը 2020 թվականին կրճատվել է 3,1 %-ով։ Այդպիսի ցուցանիշ է հրապարակել ՌԴ պետական վիճակագրության դաշնային ծառայությունը (Ռոսստատը)։
Գերատեսչությունը նշում է, որ նման անկման հիմնական պատճառներն են կորոնավիրուսի պատճառով առկա սահմանափակումներն ու էներգառեսուրսների համաշխարհային գների նվազումը։
Ամենամեծ անկումը գրանցվել է հյուրանոցային և ռեստորանային բիզնեսում (- 24,1 %), ինչպես նաև տրանսպորտային (-10,3 %) և մշակութա-սպորտային (-11,4 %) ճյուղերում: Իսկ ամենամեծ աճը գրանցվել է ֆինանսների և ապահովագրության ոլորտներում (+7,9 %)։
21-րդ դարում սա երրորդ տարին է, երբ Ռուսաստանում, տարեկան կտրվածքով, գրանցվել է ՀՆԱ-ի անկում։ 2009 թվականին, համաշխարհային տնտեսական ճգնաժամի պատճառով, Ռուսաստանի ՀՆԱ-ն ընկել էր 7,8 %-ով, իսկ 2015 թվականին, Ռուսաստանի նկատմամբ կիրառված պատժամիջոցների և նավթի գների կտրուկ անկման պատճառով, ռուսական ՀՆԱ-ն նվազել էր 2,3 %-ով։
Լուսանկարը՝ Վիքիպահեստից
Մեկնաբանել