Մոսկվայի Սիմոնովյան շրջանային դատարանը բավարարել է ՌԴ Պատիժների կատարման դաշնային ծառայության միջնորդությունը, որը պահանջում էր, «Իվ Ռոշե»-ի գործով, ռուս քաղաքական գործիչ Ալեքսեյ Նավալնիի պայմանական ազատազրկումը փոխարինել իրական ազատազրկմամբ։ Այդ մասին գրում է Meduza-ն։ 

Նավալնին դատապարտվել է 3,5 տարվա ազատազրկման։ Պայմանական ազատազրկումը փոխարինելու որոշումն առայժմ ուժի մեջ չի մտել, իսկ կողմերը այն բողոքարկելու համար ունեն 10 օր ժամանակ: Նավալնիի պաշտպաններն արդեն իսկ հայտարարել են նման մտադրության մասին։

Դատական նիստի ժամանակ ՌԴ Պատիժների կատարման դաշնային ծառայության ներկայացուցիչը հայտարարել է, որ Նավալնին ավելի քան 50 անգամ խախտել է պատժի կրման կանոնները, այդ թվում չի ներկայացել համապատասխան գերատեսչություն, ինչը պայմանական ազատազրկման պահանջներից մեկն է։ Դատախազությունը միացել էր դաշնային ծառայության միջնորդությանը, իսկ Նավալնիի պաշտպանները պահանջել մերժել այն։

«ОВД-Инфо»-ի տվյալներով՝ դատական նիստի ընթացքում ոստիկանությունը բերման է ենթարկել Նավալնիի ավելի քան 300 աջակիցների, որոնք գտնվում էին դատարանի շենքի մոտ։

Լուսանկարը՝ Մոսկվայի քաղաքային դատարանի մամուլի ծառայության