Այս տարվա ավարտին Հայաստանի պետական պարտքը կկազմի մոտ 8,9 մլրդ դոլար։ Այս մասին լրագրողների հետ ճեպազրուցում հայտնեց ֆինանսների նախարար Ատոմ Ջանջուղազյանը։

Հայաստանի պետական պարտքը անցյալ տարվա վերջին կազմում էր 7 մլրդ 968 մլն դոլար։ Հայաստանն իր պարտքային բեռն ավելացնում է 750 մլն դոլարով։ 

«Նախարարին չի մտահոգու՞մ, թե որքան կկազմի պետական պարտք-ՀՆԱ հարաբերակցությունը, և ինչ ուղղությամբ են պատրաստվում ծախսել այդ գումարները»,- հարցրեց «Ազատության» թղթակիցը։ Ատոմ Ջանջուղազյանն ի պատասխան հայտնեց, որ այդ գումարները ծախսվում են բյուջեով նախատեսված ուղղություններով, քանի որ այն բյուջեի դեֆիցիտի ֆինանսավորման աղբյուր է։

«Ենթադրվում է, որ կառավարության պարտք-ՀՆԱ հարաբերակցությունը 66,3 տոկոս է լինելու։ Կառավարության պարտքը ենթադրվում է, որ բացարձակ թվով կմոտենա 8,5 մլրդի։ Պետական պարտքը կկազմի մոտավորապես 8,9 մլրդ դոլար։ Մոտ 66% Կառավարության պարտքն է, մոտ մինչև 70%՝ ընդհանուրը»,- ասաց Ատոմ Ջանջուղազյանը։

Ըստ նախարարի՝ պետք է մտածենք ոչ թե պարտքը բացարձակ թվով նվազեցնելու մասին, այլ՝ ՀՆԱ-ի ավելի արագ աճի։