«Հայացք». հայկական ընտրազանգվածը ներվրացական նախընտրական պայքարում
Վրաստանում նախընտրական գործընթացների թափ հավաքելուն զուգընթաց, ընտրական գործընթացի հիմնական դերակատարները սկսել են ազգային փոքրամասնություններին իրենց կողմը գրավելու քայլերը: Նախօրեին «Վրացական երազ» ընդդիմադիր կոալիցիայի առաջնորդ Բ. Իվանիշվիլին հանդիպել է Վրաստանի հայ համայնքի ներկայացուցիչների հետ և շնորհավորել նրանց Ծաղկազարդի տոնի կապակցությամբ: Ընդ որում` Իվանիշվիլու անձնական կայքում տեղադրված տեղեկատվության մեջ չկա պարզաբանում, թե վիրահայ համայնքի կոնկրետ որ ներակայացուցիչներն են մասնակցել հանդիպմանը: Ըստ «Ռեգնումի» մեջբերման. «Հանդիպման ժամանակ քննարկվել է երկրում ստեղծված իրավիճակը: Հայ համայնքի ներկայացուցիչները ցանկություն են հայտնել ակտիվորեն մասնակցել քաղաքական գործընթացներին և աջակցել կոալիցիային նրա նպատակների իրագործման ուղղությամբ: Նրանք նաև տեղեկացրել են, որ տարածաշրջաններում ապրող հայ համայնքի որոշ ներկայացուցիչներ չեն կարողացել ժամանել, որովհետև նրանց զանգահարել են և սպառնալիքներով ստիպել հրաժարվել»:
Ամեն ինչից երևում է, որ «Վրացական երազ» ընդդիմադիր կոալիցիայի և Վրաստանի իշխանությունների միջև պայքարը լինելու է շատ կոշտ ու անզիջում: Իշխանությունները կարծես մտադիր չեն վերականգնել «Վրացական երազի» հիմնադիր և առաջնորդ Իվանիշվիլու քաղաքացիությունը, թեպետ հիշյալ հարցի դրական կամ բացասական պատասխան տալու օրինական ժամկետները սպառվում են: Ըստ ընդդիմադիր կոալիցիայի մամուլի քարտուղար Մ. Պանջիկիձեի պնդման` իշխանությունները ստիպված են լինելու վերականգնել օլիգարխի քաղաքացիությունը, որովհետև «այդ նպատակով նրանց նկատմամբ առկա է ներքին և արտաքին լուրջ ճնշում»:
Մինչդեռ իշխանության գործողությունները ամենևին էլ լավատեսություն չեն ներշնչում: Սահակաշվիլին և իր թիմը ճնշում են գործադրում բոլոր ուղղություններով` Իվանիշվիլու և նրա գլխավորած կոալիցիայի հասարակական նշանակությունը նվազեցնելու համար: Ծայրաստիճան լարված հակադրությունը դրսևորվում է անգամ մանրուքներում: Վերջերս ամերիկյան հայտնի Ազգային ժողովրդավարության ինստիտուտը (NDI) հրապարակել էր սոցհարցում, որի համաձայն «Վրացական երազ» կոալիցիայի վարկանիշը Վրաստանի բնակչության շրջանում ընդամենը 10% էր, մինչդեռ իշխող «Ազգային շարժմանը» վերագրվել էր 47% վարկանիշ: Իվանիշվիլին անմիջապես իր դժգոհությունն է հայտնել Վրաստանում ԱՄՆ դեսպանին այս կապակցությամբ, և դեսպան Ջ. Բասսը հարկադրված է եղել պարզաբանել, որ NDI-ի տվյալ սոցհարցումը չի ֆինանսավորվել ամերիկյան կառավարության կողմից: Ընդդիմություն-իշխանություն հարաբերությունների ծայրահեղ լարվածության մասին է վկայում նաև Վրաստանում հրատարակվող և ամերիկյան Forbes-ի վրացական վարկածը հանդիսացող Forbes Georgia ամսագրի թղթակից Ռ. Սաքևարիշվիլու հետ կապված սկանդալը: Վերջինս հայտարարեց, որ այլևս չի թղթակցելու Forbes Georgia-ին, որովհետև պարբերականի խմբագիրը երկար ժամանակ չի տպագրել Իվանիշվիլու հետ իր հարցազրույցը` պահանջելով տեքստում իրականացնել որոշակի «սրբագրումներ»: Խորհրդարանական ընտրություններից մի քանի ամիս առաջ այսպիսի փոխադարձ անհանդուրժողությունը ցույց է տալիս, որ ընտրական գործընթացի խաղաղ հանգուցալուծման հավանականությունը Վրաստանում դառնում է խիստ անհավանական:
Նման իրավիճակում ազգային փոքրամասնությունները, տվյալ դեպքում` հայկական համայնքը, թերևս պետք է զերծ մնան միանշանակ դիրքորոշում արտահայտելուց և չընդգրկվեն ո՛չ իշխանությանը, ո՛չ էլ ընդդիմությանը սատարելու դրսևորումներում: Անշուշտ, վիրահայությունը Սահակաշվիլու ներքին քաղաքականությունից դժգոհելու ավելի քան բավարար հիմքեր ունի, և միայն դրանց թվարկումը առանձին հոդվածի նյութ է: Բայց մինչ այժմ Իվանիշվիլին ու նրա թիմն էլ որևէ առարկայական բան չեն առաջարկում ազգային փոքրամասնություններին` Վրաստանում նրանց կարգավիճակի, ազգային լեզվի և մշակույթի զարգացման, ազգային փոքրամասնությունների բնակության տարածաշրջաններում կուտակված տնտեսական և սոցիալական հիմնախնդիրների լուծման ուղղությամբ: Եվ ինչպես իշխանությունները, վարչատարածքային ինքնավարության մասին լսել անգամ չեն ուզում: Իսկ Վրաստանի բոլոր քաղաքացիների համար ազատ և ժողովրդավարական երկիր կառուցելու մասին խոստումներում ժամանակին պակաս շռայլ չէր նույն Սահակաշվիլին, սակայն արդյունքում նրա իշխանության գալուց 9 տարի անց նույն Ջավախքում կուտակված հիմնախնդիրները ոչ միայն չեն լուծվել, այլև տարբեր ուղղություններով Թբիլիսիի ճնշումը միայն մեծացել է` Հայաստանի հայեցողական պասիվության պայմաններում: Ուստի վիրահայ համայնքը առաջիկա ընտրություններում պետք է առաջին հերթին կողմնորոշվի սեփական անվտանգության ապահովման առումով, որպեսզի որևէ ձևով չներքաշվի այլևս խիստ հավանական թվացող ներվրացական հերթական առճակատման մեջ:
Վ. ՎԱՐԴԱՆՅԱՆ
Մեկնաբանել