Կառավարության շենքը զավթելու փորձ կատարելու մեջ մեղադրվող Արագած Ախոյանին, Արշակ Զաքարյանին, Վահագն Չախալյանին, Տիգրան Չոբանյանին և Իսրայել Հակոբկոխյանին չկալանավորելու վերաբերյալ որոշումները բողոքարկվել են Վերաքննիչ դատարան։ Այս մասին «Հետք»-ի հարցին ի պատասխան՝ ասաց Գլխավոր դատախազության հանրային կապերի բաժնի պետ Արևիկ Խաչատրյանը։

Հիշեցնենք, որ հունվարի 28-ին քաղաքացիները Հանրապետության հրապարակում բողոքի ակցիա են իրականացրել Նիկոլ Փաշինյանի հրաժարականի պահանջով։ Կառավարության շենքի մոտ, որտեղ բախումներ են տեղի ունեցել ոստիկանության ու քաղաքացիների միջև, մի խումբ անձինք փորձել են մուտք գործել շենք։ Այս դեպքից հետո երկու տասնյակից ավելի քաղաքացի է բերման ենթարկվել, որոնց թվում՝ Արագած Ախոյանը, Արշակ Զաքարյանը, Իսրայել Հակոբկոխյանը, Տիգրան Չոբանյանը և Վահագն Չախալյանը։ Վերջիններիս մի խումբ անձանց կողմից, նախնական համաձայնությամբ շենք-շինություններ զավթելու փորձ կատարելու մեղադրանք է առաջադրվել և կալանավորման միջնորդություններ ներկայացվել դատարան, որոնք, սակայն, մերժվել են։

Նշենք, որ բերման ենթարկվելուց օրեր անց բռնցամարտիկ, Եվրոպայի և աշխարհի չեմպիոն Իսրայել Հակոբկոխյանը սրտի կաթվածով տեղափոխվել է հիվանդանոց և վիրահատվել։