Արմավիրի մարզի Վանանդ գյուղի բնակիչները միաբերան նշում էին, թեեւ իրենց ընտրակաշառք առաջարկելու են, սակայն չեն վերցնելու, քանի որ ընտրությունները ապագայի հարց է:

Գրիշա Սմբատյանը նշեց, թե ծխող մարդ է եւ այս պահին էլ ծխախոտի գումար չունի, սակայն եթե նույնիսկ իրեն 2000 դոլար էլ առաջարկեն, չի վերցնելու, քանի որ այդպիսով կվաճառի իրեն եւ «քար կգցի» իր երեխաների ապագայի վրա:

Իսկ մեկ այլ վանանդցի` Հմայակ Հարությունյանը նշում է, որ ինքը մինչ այս պահը ընտրակաշառք չի վերցրել, սակայն կառավարությունը մարդկանց այն օրն է գցել, որ բոլորն էլ գումարի կարիքն ունեն, եւ հնարավոր է այս անգամ վերցնի: Նա արդեն զզվել է իր «մաքրությունից», քանի որ համատարած բոլորն էլ վերցնում են ընտրակաշառք:

Նշենք, որ շատերն էլ չհամաձայնեցին տեսախցիկի առջեւ խոսել՝ պատճառաբանելով, թե հետագայում խնդիրներ կունենան: Սակայն բոլորն էլ ասում էին, որ չեն հավատում մայիսի 6-ի խորհրդարանական ընտրությունների արդար եւ ազնիվ անցկացնելու իշխանությունների խոստումներին: