Տեղեկացրել էինք, որ Կենտրոնական ընտրական հանձնաժողովը ապրիլի 1-ին գրանցել է մայիսի 6-ի խորհրդարանական ընտրություններին մասնակցել ցանկացող բոլոր 8 կուսակցություններին եւ Հայ ազգային կոնգրեսին:

Այս օրերին «Բարգավաճ Հայաստան» կուսակցության ցուցակում «նորաձեւումներ» են արվում: Ինքնաբացարկի դիմում են ներկայացրել ցուցակի 60-րդ տեղը զբաղեցնող Գեղարքունիքի մարզպետ Նվեր Պողոսյանն ու Տավուշի մարզպետ Սերգեյ Բագրատյանը, ով 62-րդ համարն է:

Գեղարքունիքի մարզպետ Նվեր Պողոսյանը «Հետքի» հետ զրույցում ասաց, թե «Կուսակցության քաղաքական խորհուրդը նպատակահարմար է գտել, որ ես աշխատեմ գործադիր մարմնում, ես էլ ինքնաբացարկ եմ հայտնել»:

Սա նշանակում է, որ մինչեւ ընտրությունների արդյունքների հրապարակումը երկու մարզպետներն էլ մնալու են իրենց պաշտոններում: Այսպիսով ԲՀԿ-ն որոշել է մարզպետներին թողնել իրենց պաշտոններում եւ հանել ցուցակներից, որպեսզի վերջիններս քարոզարշավի ժամանակ արձակուրդ չգնան եւ կարողանան ավելի օգտակար լինել կուսակցության համար:

Եթե ԲՀԿ-ն լավ արդյունքներ գրանցի, ապա վստահ կարելի է ասել, որ «լավ աշխատած» մարզպետները հաստատ անգործ չեն մնա: