Ճապոնիայում շաբաթ օրը՝ փետրվարի 13-ին, տեղի ժամանակով 23:08-ին, 7,3 մագնիտուդ ուժգնությամբ երկրաշարժ է գրանցվել։ Երկրի ազգային օդերևութաբանական ծառայության տվյալներով՝ երկրաշարժի էպիկենտրոնը գտնվել է Ճապոնիայի հյուսիս-արևելքում՝ Ֆուկուսիմա պրեֆեկտուրայում։ 

Վերջին տվյալներով` երկրաշարժից առնվազն 30 մարդ է տուժել։ Ազգային օդերևութաբանական ծառայությունը հայտարարել էր ցունամիի վտանգի մասին, սակայն ընդգծել, որ փլուզման վտանգ առկա չէ։ Միևնույն ժամանակ Ճապոնիայի հանրային հեռուստատեսությունը բնակիչներին կոչ է արել չմոտենալ առափնյա հատվածներին։ Ավելի ուշ, ցունամիի վտանգի մասին զգուշացումը հանվել է։ 

地震が大きかったので、なぜか反射的に動画撮ってしまったけどなんかワロタ pic.twitter.com/VOSl6PnGfj

— ひめい (@himei42) February 13, 2021

Գրասենյակներում և բնակելի տներում տեխնիկա և կահույք է ընկել։ Մոտ 950 հազար տուն մնացել է առանց հոսանքի։ Ներկայումս ստորգետնյա ցնցումները դադարել են, սակայն ճապոնացի օդերևութաբանները զգուշացնում են հնարավոր հետցնցումների մասին։

Kyodo գործակալության տվյալներով՝ Ֆուկուսիմա և Միյագի պրեֆեկտուրաներում երկրաշարժի պատճառով հրդեհներ են առաջացել։ 

Ճապոնիայի նախարարների կաբինետի գլխավոր քարտուղար Կացունոբու Կատոն արտակարգ մամուլի ասուլիսի ժամանակ կոչ է արել բնակչությանը պահպանել հանգստություն և նշել, որ իշխանություններն անում են ամեն ինչ աղետի հետևանքները վերացնելու ուղղությամբ։ Ավելի ուշ, Ճապոնիայի վարչապետ Յոսիհիդե Սուգան հայտարարել է, որ երկրաշարժի արդյունքում զանգվածային փլուզումներ չեն արձանագրվել։ 

Լուսանկարը՝ Associated Press գործակալության