Ազգային ժողովի անկախ պատգամավորներ Սերգեյ Բագրատյանն ու Տիգրան Ուրիխանյանն առաջարկում են հնարավորություն ընձեռել խմբակցության կազմից դուրս եկած պատգամավորին խմբակցությունից դուրս եկած կամ հեռացված պատգամավորների հետ խումբ կազմելու: Պատգամավորները փոփոխություններ են առաջարկում Ազգային ժողովի կանոնակարգ օրենքում:

Գործող օրենքով պաատգամավորն իրավունք ունի դուրս գալ խմբակցությունից և գործել որպես անկախ պատգամավոր: Սակայն օրենքը հնարավորություն չի տալիս ընդգրկվել հանձնաժողովում (իր նախկին խմբակցությունը կարող է փոխարինել վերջինիս մեկ այլ պատգամավորով) կամ բարեկամական խմբում:

Պատգամավորներն առաջարկում են օրենքում կատարել լրացում, որով պատգամավորը իրավունք կունենա ոչ միայն դուրս գալու խմբակցությունից, այլև խմբակցությունից դուրս եկած կամ հեռացված պատգամավորների հետ խումբ կազմելու:

Ըստ հեղինակների՝ սրանով միջոց կստեղծվի ունենալ հատուկ կարգավիճակ և նշված անձանց կողմից աշխատանքները կկատարվեն համատեղ, համակարգված, ինչն առավել արդյունավետ է:

Նախագծի համահեղինակ Սերգեյ Բագրատյանը մեզ հետ զրույցում նշեց, որ այս փոփոխությունը հնարավորություն կտա խմբակցություններից դուրս եկած պատգամավորներին համատեղ նախագծեր մշակել, միասին քվեարկել, ձևավորել խումբ, որտեղ հավաքական կարծիքներ կլինեն: Ըստ Բագրատյանի՝ այդ տարբերակով անկախ պատգամավորները կարող են շատ ավելի արդյունավետ աշխատել՝ միավորելով ջանքերը: Բագրատյանը նաև ընդգծեց՝ կա հանրային պահանջ ուղղված իշխանություն-ընդդիմություն դիսկուրսից դուրս, ուստի անկախ պատգամավորների խումբը կարող է նոր գաղափարներ առաջարկել հանրությանը:

Նախագիծը քաղաքական մեծամասնության պատգամավորների հետ դեռ չեն քննարկել, սակայն հեղինակները խոսել են «Իմ քայլը» խմբակցությունից դուրս եկած պատգամավորների հետ: Հիշեցնենք, որ թե՛ Բագրատյանը, թե՛ Տիգրան Ուրիխանյանը դուրս են եկել «Բարգավաճ Հայաստան» խմբակցությունից: 3 խմբակցություններից դուրս եկած պատգամավորներ էլ կան, սակայն գերակշռում են «Իմ քայլ»-ից դուրս եկածները: Այս պահին խմբակցություններում չընդգրկված ութ պատգամավոր կա, որոնցից հինգը նախկին իմքայլական են: