Լուր-մեկնաբանություն բաժնում անդրադառնալով մարտի 1-ի քննչական խմբի ղեկավար Վահագն Հարությունյանի հայտարարությանը, թե «Ռոբերտ Քոչարյանը որեւէ սխալ բան չի ասել, նախաքննությամբ պարզվել է, որ մարտի 1-ին Մյասնիկյանի արձանի մոտ եղել են զինված ցուցարարներ»` թերթը գրում է. «Սկսենք նրանից, որ զինված ցուցարարների առկայունն այդպես էլ չի ապացուցվել: Բացի այդ էլ, որքան հասկանում ենք, զինված ցուցարարների առկայությունը եւ «մեքենայի հետեւից կրակելն ու նորից թաքնվելը» բոլորովին տարբեր բաներ են: Դա նույնն է, թե վկան մեկին մեղադրի բռնաբարության մեջ, քննիչն էլ ասի «վկան որեւէ սխալ բան չի ասել, նախաքննությամբ պարզվել է, որ կասկածյալն ունի բռնաբարության համար անհրաժեշտ բոլոր օրգանները»: Բայց սա` իմիջիայլոց: Շատ ավելի կարեւոր է, որ քննչական խումբն այդպես էլ չի կարողացել բացահայտել «զինված ցուցարարներին», մինչդեռ դրա համար պետք էր ընդամենը հարցաքննել Ռոբերտ Քոչարյանին եւ պարզել, թե որտեղի՞ց է նա ստացել այդ ինֆորմացիան, ո՞վ է նրան այդպիսի բան զեկուցել (եթե կադրեր լինեին, «Հ1»-ը օրը քսան անգամ ցույց կտար, հետեւաբար` կամ Քոչարյանն ինքն է հորինել դա, կամ նրան զեկուցել են):

Այսպես թե այնպես, Քոչարյանին ծանուցագիր ուղարկելու պահը հասունանում է: