Այսօր տեղի է ունեցել ՀՀ կառավարության հերթական նիստը, որը վարել է վարչապետ Տիգրան Սարգսյանը։ Նա նիստը սկսել է 2012 թ. առաջին եռամսյակի բյուջետային հավաքագրման արդյունքն ամփոփելով։

«Մենք հարկային և մաքսային հավաքագրման, ինչպես նաև սոցիալական ապահովության վճարների ծրագիրն ամբողջությամբ կատարել և նույնիսկ գերակատարել ենք։ Հավաքվել է 177 մլրդ դրամ, ինչը 2011 թվականի նույն ժամանակահատվածի համեմատ ավելի է 7 մլրդ 570 մլն դրամով։ Այսպիսով, ծրագիրն ամբողջությամբ կատարվում է, և համոզված եմ, որ այս տեմպը մինչև տարեվերջ կպահպանենք»,- ասել է Տիգրան Սարգսյանը:

Նա տեղեկացրել է, որ կառավարությունն արդեն հաստատել է միջնաժամկետ ծախսային ծրագրի մակրոտնտեսական ցուցանիշները, համաձայնության եկել Կենտրոնական բանկի և Արժույթի միջազգային հիմնադրամի հետ։ Բոլոր գերատեսչություններին հանձնարարվել է իրենց ծախսային ծրագրերը նախապատրաստել 3 տարվա կտրվածքով։