Երևան քաղաքի ընդհանուր իրավասության դատարանը՝ նախագահությամբ դատավոր Մանվել Շահվերդյանի, քիչ առաջ մերժեց Ազգային անվտանգության ծառայության միջնորդությունը՝ «Գագիկ Սողոմոնյան» ֆեյսբուքյան օգտատիրոջ գործով մեղադրյալ Մհեր Ավագյանին կալանավորելու վերաբերյալ։ Այս մասին «Հետք»-ի հետ զրույցում ասաց Ավագյանի պաշտպան Միքայել Շխիմյանը։

Հիշեցնենք, որ Ավագյանը ձերբակալվել է փետրվարի 19-ին՝ «Պառլամենտարիզմի զարգացման միջազգային կենտրոն» հասարակական կազմակերպության գրասենյակում Ազգային անվտանգության ծառայության իրականացրած  խուզարկությունից հետո։  Միքայել Շխիմյանը մեզ հետ զրույցում ասաց, որ իր պաշտպանյալին  մեղադրանք է առաջադրվել քրեական օրենսգրքի 226, 226.2 և 307․4 հոդվածներով մասնավորապես՝ ազգային, ռասսայական կամ կրոնական թշնամանք հարուցելու, մի խումբ անձանց կողմից նախնական համաձայնությամբ կամ կազմակերպված խմբի կողմից բռնություն գործադրելու հրապարակային կոչերը, բռնությունը հրապարակայնորեն արդարացնելու կամ քարոզելու և ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները խախտելը։ Ազգային անվտանգության ծառայությունը Ավագյանին կալանավորելու միջնորդություն է ներկայացրել դատարան։ Դատավոր Մանվել Շահվերդյանը քննել է և՛ ԱԱԾ-ի միջնորդությունը՝ կալանավորման վերաբերյալ, և՛ պաշտպան Միքայել Շխիմյանի միջնորդությունը՝ Ավագյանին ձերբակալելու որոշման դեմ։ Պաշտպանը մեզ զրույցում ասաց, որ դատարանը ոչ իրավաչափ է ճանաչել Մհեր Ավագյանի ձերբակալման որոշումը։

Լուսանկարում՝ դատավոր Մանվել Շահվերդյանը