Եկամտային հարկը կվերադարձվի նաև պայմանագրով կառուցապատման իրավունք ունեցող քաղաքացիներին
Ազգային ժողովի «Իմ քայլը» խմբակցության պատգամավորներ Բաբկեն Թունյանն ու Արտակ Մանուկյանը փոփոխություններ են առաջարկում Հարկային օրենսգրքում և «Եկամտային հարկի մասին» օրենքում: Գործող օրենքով` անմիջապես կառուցապատողից բնակարան ձեռք բերելու պարագայում հիփոթեքային վարկի սպասարկման համար վճարվող տոկոսների գումարների չափով եկամտային հարկը վերադարձվում է քաղաքացուն: Պատգամավորներն առաջարկում են արտոնությունը կիրառել նաև այն դեպքում, երբ ֆիզիկական անձինք բնակարանը կառուցապատողից ձեռք են բերում բնակարանի կառուցապատման իրավունքով:
Նախագծում նշվում է, որ գործնականում առկա են դեպքեր, երբ ֆիզիկական անձինք բնակարանը կառուցապատողից ձեռք են բերում բնակարանի կառուցապատման իրավունք ձեռք բերելու միջոցով, և այս պարագայում եկամտային հարկի վերադարձման համակարգը չի գործում: Ուստի, առաջարկվում է սահմանել, որ հիփոթեքային վարկի սպասարկման համար վճարվող տոկոսների գումարների չափով եկամտային հարկի վերադարձման համակարգը կիրառվում է նաեւ բնակարան ձեռք բերելու նպատակով կառուցապատողից կառուցապատման իրավունք ձեռք բերած՝ վարձու աշխատող հանդիսացող ֆիզիկական անձանց նկատմամբ:
Մեզ հետ զրույցում նախագծի համահեղինակ Բաբկեն Թունյանն ընդգծեց` իրենց առաջարկը տեխնիկական բնույթ ունի, չեն առաջարկում շահառուների ցանկն ընդլայնել: Նրա խոսքով` մի քանի տասնյակ անձինք նման խնդրի են բախվել, երբ կառուցապատողից բնակարան են գնել, սակայն պայմանագրում նշված է եղել կառուցապատման իրավունք, ինչը խոչընդոտել է, որ օգտվեն եկամտային հարկի վերադարձի օրենքից:
Խնդիրն այն է, որ պայմանագրերի մի մասում նշված է անշարժ գույքի իրավունքի գնման վկայագիր, մյուսում` կառուցապատման իրավունք: Վերջին դեպքում ՊԵԿ-ը մերժել է այդ անձանց դիմումները: Պատգամավորներին խնդրի մասին տեղեկացրել են թե' քաղաքացիները, թե' կառուցապատող կազմակերպությունները: Հարցը քննարկվել է ՊԵԿ ներկայացուցիչների հետ` առաջարկելով այս լուծումը: Թունյանի խոսքով` նույնիսկ նախադեպ կա, երբ քաղաքացին դատական կարգով է վիճարկել պայմանագրի այդ դրույթը և կարողացել ՊԵԿ-ից փոխհատուցում ստանալ:
Հարցին, թե այս պահին որն է Կառավարության դիրքորոշումը եկամտային հարկի վերադարձի օրենքի վերաբերյալ, քանի որ նախորդ տարի ֆինանսների նախարարն ակնարկեց, որ մտադիր են աստիճանաբար հրաժարվել վերջինից, Բաբկեն Թունյանը պատասխանեց` Ֆիննախը միշտ էլ այն կարծիքին է եղել, որ այս մեխանիզմն աստիճանաբար պետք է վերանա:
Սակայն, կորոնավիրուսն ու պատերազմական իրավիճակը հետաձգել են նման նախաձեռնության անհրաժեշտությունը: Թունյանի խոսքով` այս պահին առարկայական որևէ խոսակցություն չկա, եթե նման նախագիծ լինի, հասարակությունը կտեղեկացվի, նաև` անմիջապես ուժի մեջ չի մտնի: ԱԺ տնտեսական հարցերի մշտական հանձնաժողովի նախագահն ընդգծեց` ընդունվելու պարագայում էլ փոփոխությունները չեն կարող ազդել արդեն իսկ շահառուների վրա:
Մեկնաբանել