Ադրբեջանի ավտոմոբիլային ճանապարհների պետական գործակալության վարչության նախագահ Սալեհ Մամեդովը հայտարարել է, որ 2021 թվականի մարտին կսկսվի Քարվաճառ տանող ճանապարհի շինարարությունը։ Նա այդ մասին խոսել է Բաքվում կայացած ճեպազրույցի ժամանակ։

Մամեդովի խոսքով՝ ներկայում ընթանում են ճանապարհի նախագծման աշխատանքները։ «Նախագահ Իլհամ Ալիևի հանձնարարությամբ, անվտանգ երթևեկության նպատակով, կառուցվում է նոր ճանապարհ։ Այն կանցնի Գյանջա-Գյոյգյոլ երթուղով։ Դեռևս օգտագործվում է Թերթեր-Աղդերե (Մարտակերտ, խմբ.)- Քելբաջար (Քարվաճառ, խմբ.) ճանապարհը։ Արդեն երկու ամիս է, ինչ ընթանում են նախագծման աշխատանքներ։ Ճանապարհի կառուցումը կսկսվի մարտին և կիրականացվի թուրքական ընկերության հետ միասին»,- ընդգծել է Մամեդովը։

Հիշեցնենք, որ նոյեմբերի 9-ի երեկոյան Հայաստանի, Ադրբեջանի և Ռուսաստանի ղեկավարների ստորագրած հայտարարությամբ Արցախում մարտական գործողությունները դադարեցվեցին։ Համաձայն այդ փաստաթղթի՝ հայկական կողմը մինչև դեկտեմբերի 1-ը Ադրբեջանին հանձնեց Քարվաճառի, Ակնայի և Քաշաթաղի շրջանները։

Լեռնային Ղարաբաղում շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորախումբը:

Լաչինի միջանցքը (5 կմ լայնությամբ), որն ապահովում է Արցախի կապը Հայաստանի հետ՝ շրջանցելով Շուշի քաղաքը, մնաց Ռուսաստանի խաղաղապահ զորակազմի վերահսկողության ներքո:

Զորախմբի հիմնական մասը կազմում են ՌԴ զինված ուժերի Կենտրոնական ռազմական օկրուգի 15-րդ առանձին մոտոհրաձգային բրիգադի զինծառայողները։

Լուսանկարում՝ Ֆիզուլի-Շուշի կառուցվող ավտոճանապարհը/ Trend.az-ից