Տեսանյութեր
Լուսանկարներ
Արմեն Սարգսյանն ընդունել է Հվ․ Կովկասում և Վրաստանի ճգնաժամի հարցերով ԵՄ հատուկ ներկայացուցչին
Հանրապետության նախագահ Արմեն Սարգսյանը փետրվարի 24-ին ընդունել է Հարավային Կովկասում և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարի գլխավորած պատվիրակությանը: Հանդիպմանը մասնակցել է նաև Հայաստանում ԵՄ պատվիրակության ղեկավար, ԵՄ դեսպան Անդրեա Վիկտորինը։ Այս մասին տեղեկացնում է նախագահականի մամուլի ծառայությունը։
Զրուցակիցներն անդրադարձել են պատերազմից հետո ստեղծված նոր իրողություններին, տարածաշրջանում անվտանգության և կայունության հարցերին: ԵՄ հատուկ ներկայացուցիչը վերահաստատել է Եվրամիության աջակցությունը ԵԱՀԿ Մինսկի խմբի համանախագահությանը և ղարաբաղյան հակամարտության կարգավորման խաղաղ գործընթացին:
Նախագահ Արմեն Սարգսյանը մասնավորապես անդրադարձել է մարդասիրական խնդիրներին՝ առանցքային համարելով Ադրբեջանում պահվող՝ հայկական կողմից գերիների՝ զինծառայողների ու քաղաքացիական անձանց շուտափույթ և անհապաղ վերադարձին, ինչպես նաև անհետ կորած անձանց հայտնաբերելուն և հայկական կողմին հանձնելուն առնչվող հարցերը:
Ինչպես ասվում է պաշտոնական հաղորդագրությունում, խոսելով հետպատերազմական շրջանում ի հայտ եկած նոր մարտահրավերների մասին՝ նախագահ Սարգսյանն անդրադարձել է սահմանազատման և սահմանագծման գործընթացներին, հատկապես Սյունիքի մարզի սահմանամերձ համայնքների անվտանգության հետ կապված խնդիրներին:
Հանդիպման ընթացքում զրուցակիցները մտքեր են փոխանակել նաև ՀՀ-ԵՄ գործընկերության օրակարգի շուրջ՝ անդրադառնալով ապագա համագործակցության հնարավորություններին և արդյունավետ փոխգործակցություն ակնկալելով:
Մեկնաբանել