Կրեմլում տագնապով հետևում են Հայաստանում իրավիճակի զարգացմանը, սակայն համարում են, որ Հայաստանում տեղի ունեցող իրադարձություններն այդ երկրի ներքին գործն են։ Այդ մասին կայացած ճեպազրույցի ժամանակ լրագրողներին հայտարարել է Ռուսաստանի նախագահի մամուլի քարտուղար Դմիտրի Պեսկովը։

«Մենք տագնապով հետևում ենք Հայաստանում իրավիճակի զարգացմանը և կարծում ենք, որ դա բացառապես Հայաստանի ներքին գործն է, որը Կովկասում մեզ համար շատ կարևոր և մոտ դաշնակից է»,- նշել է Պեսկովը։

Նրա խոսքերով՝ Հայաստանում իրավիճակի վերաբերյալ դեռևս կապ չի եղել Մոսկվայի և Երևանի միջև, սակայն անհրաժեշտության դեպքում օպերատիվ կերպով կկազմակերպվի։

Հինգշաբթի՝ փետրվարի 25-ի կեսօրին, ՀՀ ԶՈւ գլխավոր շտաբը տարածել էր հայտարարություն, որտեղ նշվում էր, որ երկրում ստեղծված իրավիճակի պատճառով Գլխավոր շտաբը պահանջում է վարչապետի և կառավարության հրաժարականը, ինչպես նաև խորհուրդ տալիս խուսափել ուժի կիրառումից։ Գլխավոր շտաբը հայտարարել էր, որ «ՀՀ վարչապետը և կառավարությունն այլևս ի վիճակի չեն ընդունելու ադեկվատ որոշումներ՝ հայ ժողովրդի համար այս ճգնաժամային և ճակատագրական իրավիճակում»։

Վարչապետ Նիկոլ Փաշինյանը, ֆեյսբուքյան ուղիղ եթերի ժամանակ, հայտարարել է, որ պաշտոնից ազատել է ԶՈւ ԳՇ պետ, գեներալ-գնդապետ Օնիկ Գասպարյանին։ Նա Գլխավոր շտաբի հայտարարությունն անվանել էր ռազմական հեղաշրջման փորձ և համախոհներին կոչ արել հավաքվել Հանրապետության հրապարակում։

Լուսանկարը՝ Valery Sharifulin / TASS