Հայ լոլիկագործները չեն կարողանում իրացնել իրենց ապրանքը, քանի որ հայկական շուկայում ավելի էժան գնով թուրքական լոլիկ է հայտնվել:

Ձմռան ամիսներին մշակած լոլիկի բերքը Արարատի և Արմավիրի մարզի ֆերմերները այս օրերին սկսել են վաճառքի հանել, սակայն նկատում են, որ իրենց արտադրանքը մրցունակ չէ: Գյուղացիներն ասում են, որ Թուրքիայից Հայաստան ներկրված լոլիկի գինն ավելի էժան է, քան տեղական արտադրությանը: Արմավիրի մարզի Գայ գյուղի ֆերմերներից Արտաշես Բաբախանյանը «Հայացք»-ին տեղեկացրեց, որ եթե հայկական լոլիկի 1 կիլոգրամը շուկայում վաճառվում է 900 դրամով, ապա թուրքական անորակ լոլիկը 700 դրամով է իրացվում: Սակայն ազգաբնակչությունը որակը հաշվի չի առնում և ձգտում է հնարավորինս էժան ապրանք գնել:

«Մենք իրականում տեղեկություններ ունենք, որ ներկրվող լոլիկը չի մաքսազերծվում, հակառակ դեպքում այդքան էժան չէր լինի»,- ասաց Բաբախանյանը:

Ֆերմերների տեղեկացմամբ` ամեն տարի այս սեզոնին նման խնդրի առաջ են կանգնում. տեղական արտադրանքը թուրքական և պարսկական լոլիկի կողքին գնային առումով մրցունակ չի լինում, իսկ կառավարությունը քայլեր չի ձեռնարկում հարցը լուծելու համար: Արտաշես Բաբախանյանի տեղեկացմամբ` նախորդ տարի կառավարությունը փորձել է 10-15 օրով դադարեցնել թուրքական լոլիկի ներկրումները, արդյունքում գյուղացիներն օգտվել են: Իսկ ապրանքի գինը ֆերմերները մտադիր չեն իջեցնել, քանի որ նշում են, թե ձմռան ամիսներին ջերմոցային տնտեսությունները ջեռուցելու և լոլիկը մշակելու համար մեծ ծասխեր են արել:

«Եթե տեղական արտադրանքը չենք խթանում, եթե մեր ապրանքը չվաճառվի, մենք պիտի չաշխատենք ու գնանք արտերկիր` արտագնա աշխատանքի»,- ասում են ֆերմերները:

Ի դեպ, Արմավիրի և Արարատի մարզի ֆերմերները երեկ հավաքվել էին կառավարության շենքի մոտ: Կառավարությունից նրանք գնացին ՀՀԿ գրասենյակ, որտեղ նրանց տեղեկացրին, որ կփորձեն օրերս հարցին լուծում տալ: Իսկ ՀՀԿ-ին դիմելու քայլն այսպես բացատրեցին. «Մեր իշխող կուսակցությունն ա, թող հարցին լուծում տա»: