![](/static/articles/12/80/90/l-a1VoFnwKe5.jpg)
Վալենտինա Մատվիենկո. «Ռուսաստանը տագնապով հետևում է Հայաստանում առկա իրավիճակին»
Ռուսաստանը տագնապով հետևում է Հայաստանում առկա իրավիճակին և շահագրգռված է դրա շուտափույթ կայունացմամբ։ Այդ մասին РИА Новости-ին տված հարցազրույցում հայտարարել է Ռուսաստանի Դաշնային խորհրդի նախագահ Վալենտինա Մատվիենկոն։
«Իհարկե, մենք տագնապով հետևում ենք այդ ամենին։ Եվ մենք շահագրգռված ենք, որ Հայաստանում առկա իրավիճակը որքան հնարավոր է շուտ կայունանա։ Դա կարևոր է հենց Հայաստանի, հայ ժողովրդի համար։ Անշուշտ, դա կարևոր է նաև տարածաշրջանի կայունության համար»,- նշել է Մատվիենկոն։
Հինգշաբթի՝ փետրվարի 25-ի կեսօրին, ՀՀ ԶՈւ գլխավոր շտաբը տարածել էր հայտարարություն, որտեղ նշվում էր, որ երկրում ստեղծված իրավիճակի պատճառով Գլխավոր շտաբը պահանջում է վարչապետի և Կառավարության հրաժարականը, ինչպես նաև խորհուրդ տալիս խուսափել ուժի կիրառումից։ Գլխավոր շտաբը հայտարարել էր, որ «ՀՀ վարչապետը և Կառավարությունն այլևս ի վիճակի չեն ընդունելու ադեկվատ որոշումներ՝ հայ ժողովրդի համար այս ճգնաժամային և ճակատագրական իրավիճակում»։
Վարչապետ Նիկոլ Փաշինյանը, ֆեյսբուքյան ուղիղ եթերի ժամանակ հայտարարել էր, որ պաշտոնից ազատել է ԶՈւ ԳՇ պետ, գեներալ-գնդապետ Օնիկ Գասպարյանին։ Նա Գլխավոր շտաբի հայտարարությունն անվանել էր ռազմական հեղաշրջման փորձ և համախոհներին կոչ արել հավաքվել Հանրապետության հրապարակում։
Նախագահ Արմեն Սարգսյանը փետրվարի 27-ին առարկություններով հետ էր վերադարձրել Օնիկ Գասպարյանին պաշտոնից ազատելու առաջարկությունը, որից հետո՝ նույն օրը, վարչապետ Նիկոլ Փաշինյանն այն դարձյալ հետ էր ուղարկել Հանրապետության նախագահին։
Լուսանկարը՝ Regnum գործակալության
Մեկնաբանել