![](/static/articles/12/81/14/l-xHHrtHyPX5.jpg)
Ալեն Սիմոնյան. «Ես համարում եմ, որ այս պահին կա համաձայնություն սեղանի շուրջ նստել և քննարկում սկսել»
Քաղաքական գործընթացի հանգուցալուծումը պետք է լինի ընտրությունների միջոցով, այլ տարբերակ Հայաստանում անհնար է:
Նման պնդում արեց ԱԺ փոխխոսնակ Ալեն Սիմոնյանը լրագրողների հետ զրույցում` խոսելով ներքաղաքական իրավիճակի մասին:
«Ես համարում եմ, որ այս պահին կա համաձայնություն սեղանի շուրջ նստել և քննարկում սկսել.... կարևոր է քաղաքական պրոցեսները շարունակել: Ի սկզբանե ես կողմնակից եմ եղել արտահերթ ընտրությունների, մենք, այնուամենայնիվ, գալու էինք այս խոսակցությանը»,- ասաց Սիմոնյանը:
Հիշեցնենք, որ «Լուսավոր Հայաստան» խմբակցության նախապայմանի համաձայն` եթե Օնիկ Գասպարյանն ու Տիրան Խաչատրյանը մնում են ԳՇ պետի ու պետի տեղակալի պաշտոններում, ապա իրենք պատրաստ են գնալ արտահերթ ընտրությունների` առանց վարչապետի թեկնածու առաջադրելու:
Դիտարկմանը, որ ԲՀԿ-ից Նաիրա Զոհրաբյանը պնդում է, որ պատրաստ չեն քննարկումների, Սիմոնյանն ասաց` վստահ չէ, որ այս փուլում Նաիրա Զոհրաբյանը լիովին ներկայացնում է ԲՀԿ-ն:
«Բոլորդ շատ լավ գիտեք, որ էնտեղ (նկատի ունի ԲՀԿ-ն) որոշում է մի մարդ, չեմ բացառում որ այսօր կամ վաղը նման խոսակցություն կարող է տեղի ունենալ»,- ասաց նա` նշելով, որ անելու են ամեն ինչ, որ մաքսիմալ միասնական դիրքորոշում ձևավորվի:
Սիմոնյանի խոսքով` օդում կախված հարցը` ով պետք է իշխանություն լինի, այդ հարցի պատասխանը պետք է տան քաղաքացիներն ընտրությունների միջոցով:
Մեկնաբանել