Երևանը գրքի համաշխարհային մայրաքաղաք հռչակվելու տոնակատարությունների շրջանակում հայկական կողմի հրավերով Հայաստան կայցելի Մանկապատանեկան գրքի միջազգային կոմիտեի (IBbY-ի) գործադիր տնօրեն Լիզ Փեյջը, ով պաշտոնապես կհայտարարի կոմիտեին Հայաստանի անդամակցության մասին:

Լիզ Փեյջի այցի շրջանակներում տեղի կունենան նաև շահագրգիռ կառույցների ու կազմակերպությունների հետ հանդիպումներ, քննարկումներ, կընթերցվեն դասախոսություններ:

Հայաստանն Իտալիայի Բոլոնիա քաղաքում կայացած մանկական գրքի միջազգային ամենամյա ցուցահանդեսին առաջին անգամ մասնակցել է այս տարի՝ մարտի 19-22-ը՝ մեծ հետաքրքրություն առաջացնելով այցելուների և մասնակիցների շրջանում:

Հայ գրատպության 500-ամյակը և Երևանը՝ 2012 թ. գրքի համաշխարհային մայրաքաղաք խորհրդանշող ձևավորումով հայկական տաղավարում ներկայացվել են Հայաստանում տպագրված շուրջ 250 անուն մանկական գիրք և գրքերի ձևավորումներ:

Ցուցահանդեսի ընթացքում տեղի են ունեցել «Հայ գրատպության 500-ամյակ» և «Երևանը՝ 2012 թ. գրքի համաշխարհային մայրաքաղաք» ծրագրերի, մանկագիրներ Էդվարդ Միլիտոնյանի, Նունե Սարգսյանի գրքերի շնորհանդեսները:

Ցուցահանդեսից հետո պետության պատվերով և աջակցությամբ հրատարակված մանկապատանեկան գրականությունից շուրջ 70 անուն գիրք հանձնվել է Միլանի «Հայտուն» կազմակերպությանը:

ՀՀ մշակույթի նախարարության տեղեկացմամբ՝ ցուցահանդեսի շրջանակներում հայկական պատվիրակությունը հանդիպում է ունեցել Բոլոնիայի համալսարանի հայկական մշակույթի ամբիոնի պատասխանատուների հետ: Խնկո Ապոր անվան ազգային մանկական գրադարանի տնօրեն Ռուզան Տոնոյանը հանդիպել է IBbY-ի գործադիր տնօրեն Լիզ Փեյջի հետ և քննարկել միջազգային այս կազմակերպությանը Հայաստանի անդամակցության հարցը:

Մանկապատանեկան գրքի միջազգային կոմիտեն ստեղծվել է 1953 թ. Ցյուրիխում (Շվեյցարիա): Այսօր այն միավորում է 70 երկրի ազգային կոմիտեներ: Կոմիտեի Հանս Քրիստիան Անդերսենի անվան գրական մրցանակը, որը 1956 թ. հիմնադրել է ՅՈւՆԵՍԿՕ-ի Մանկապատանեկան գրականության միջազգային խորհուրդը, մանկագիրների համար ամենահեղինակավոր միջազգային մրցանակն է, որն անվանում են նաև փոքր Նոբելյան մրցանակ: