Ոստիկանությունում տվյալներ են ստացվել, որ մարտի 3-ի ժամը 16։00-ին նախատեսված հանրահավաքի ժամանակ հնարավոր են սադրանքներ։ Այս մասին ասվում է ոստիկանության լրատվական ծառայության տարածած հայտարարությունում։

«Կոչ ենք անում զանգվածային միջոցառումներն իրականացնել բացառապես օրենքի շրջանակներում, զերծ մնալ հակաիրավական քայլերից ու չտրվել սադրանքների։

Քաղաքացիներին հորդորում ենք լինել իրավահարգ և իրենց իրավունքներն իրացնելիս պահպանել օրինականության պահանջներն ու համակեցության կանոնները։

Ոստիկանությունը հավաստիացնում է, որ օրենքով իրեն վերապահված լիազորությունների շրջանակում ձեռնարկելու է բոլոր միջոցները՝ հասարակական կարգն ապահովելու և հանրային անվտանգությունը պահպանելու համար»,- ասվում է ոստիկանության հաղորդագրությունում։

Նշենք, որ մարտի 3-ին՝ 16։00-ին, Բաղրամյան պողոտայում նախատեսված է «Հայրենիքի փրկության շարժման» հանրահավաքը։

Լուսանկարը՝ «Հայրենիքի փրկության շարժման» մարտի 1-ի հանրահավաքից