Կառավարությունը մարտի 4-ի նիստում ընդունեց որոշում, որով նախատեսվում է երկարաձգել կորոնավիրուսի տնտեսական հետևանքների չեզոքացման 25-րդ միջոցառման ժամկետները, ինչպես նաև աջակցություն ստացող ընկերությունների ծավալը։ Բյուջեի ծախսը կկազմի 50 մլն դրամ։

Միջոցառման շահառուները դիմումները կարող են ներկայացնել մինչև 2021 թվականին մարտի 14-ը։  

Հիշեցնենք, որ 25-րդ միջոցառմամբ կառավարությունն աջակցում է զբոսաշրջության ոլորտը սպասարկող տրանպորտային ընկերություններին։

Որոշմամբ միջոցառման չափանիշները բավարարող զբոսաշրջության ոլորտը սպասարկող տրանսպորտային ընկերությունների ցանկը կհամալրվի նաև տնտեսական գործունեության N77,11 դասակարգիչը (մարդատար ավտոմոբիլների և թեթևաքաշ փոխադրամիջոցների վարձույթ և լիզինգ) հայտարարագրած տրանսպորտային ոլորտի ընկերություններով։

Որոշման նախագծի ընդունման արդյունքում՝ տուժած զբոսաշրջության ոլորտը սպասարկող տրանսպորտային ընկերությունները, որոնք բավարարում են բոլոր չափանիշներին, հնարավորություն կունենան մասնակցելու ծրագրին և դառնալու միջոցառման շահառու:

Զբոսաշրջության ոլորտը սպասարկող մի շարք տնտեսավարող սուբյեկտներ ևս կստանան պետական աջակցություն՝  վարկային պարտավորությունները թեթևացնելու նպատակով։