Մենք` ինքնորոշված քաղաքացիներս, համախմբում ենք ազատ և գիտակից մարդկանց Հայաստանում, Սփյուռքում և ամբողջ աշխարհում, ովքեր հավատարիմ են համամարդկային արժեքներին, ովքեր պայքարում են հանուն մարդու առողջ և արժանապատիվ կյանքի` նվաճելու և կենսագործելու համար ՀՀ Սահմանադրությամբ և միջազգային հռչակագրերով նախանշված իրավունքներն ու արժեքները:

Արդեն շուրջ 60 օր է, ինչ Երևանի Մաշտոցի պուրակում ինտենսիվությամբ ու աճող համախմբվածությամբ շարունակում ենք մեր քաղաքացիական պայքարը հանուն մեր իրավունքների նվաճման և հանրային տարածքների ու սեփականության պաշտպանության:

Մաշտոցի պուրակում Երևանի քաղաքապետարանի կողմից տեղադրված «բուտիկները» անօրինականության, անարդարության, մարդու արժանապատվության ոտնահարման և շրջակա միջավայրի շահագործման խորհրդանիշն են: Այդ «բուտիկները» նաև անկախության 20 տարիների ընթացքում մեր հանրային ունեցվածքի կողոպտման ողջ գործընթացի արտացոլումն են: Մինչ այսօր մեր համախմբված, վճռական, իրավական պայքարի շնորհիվ մենք հաջողել ենք հանրային կառավարման մարմիններին պարտադրել դադարեցնել ապօրինի շինարարությունը Մաշտոցի պուրակում և հաշվի նստել մեզ հետ հանրային իրավական հարթությունում:

Մենք ողջունում ենք «Մաշտոցի պուրակում ինքնակամ շինությունների ապամոնտաժման նախաձեռնող խմբի» այդպիսով` նորանոր քաղաքացիական շերտերի համախմբումն այս պայքարում:

Մենք շարունակում ենք պահանջատիրական պայքարը` պարտադրելով հանրային կառավարման մարմիններին կատարել հանրության արդար և իրավական պահանջը՝ անհապաղ ապամոտաժել բոլոր «բուտիկները», վերականգնել այգին իբրև հանրային տարածք և պատասխանատվության ենթարկել ու պատժել բոլոր ապօրինի որոշում ընդունողներին և հրահանգ տվողներին: Մենք անկոտրում կամքով և վճռականորեն հետևողական ենք լինելու մեր սահմանադրական իրավունքների նվաճմանը: Ո՛չ մի զիջում և ո՛չ մի նահանջ չեն լինելու մեր կողմից:

Հանրությունը Մաշտոցի պուրակն արդեն իսկ դարձրել է մի հանրային հարթակ, որտեղ ձևաևորվում են քաղաքացիական նոր ու բազմազան նախաձեռնություններ, նոր գաղափարներ, մտքեր ու միավորումներ, որոնք փորձում են արմատականորեն փոխել ներկա իրավիճակը և քայլեր ձեռնարկել` ստեղծելու ավելի լավ՝ արդար, իրավահավասար ու համերաշխ հասարակություն, նոր որակի պետություն և մի այլ աշխարհ:

Մաշտոցի պուրակում մեր ձևավորած մթնոլորտը` հիմնված ազատության, արդարության, օրինականության, մարդկային արժանապատվության և հիմնարար իրավունքների հարգման վրա, խթանում է, որ յուրաքանչյուր ոք, առանց խտրականության, կարողանա արտահայտել իրեն ու իր ինքնուրույն մասնակցությունն ունենա այս քաղաքացիական պայքարում` հանուն հանրային տարածքի, հանրային շահի ու սեփականության պաշտպանության և հանուն մեր սահմանադրական իրավունքների կենսագործաման:

Մենք՝ քաղաքացիական նախաձեռնություններս, քաղաքացիական ակտիվիստներս, այգու պաշտպաններս, գիտակցում ենք մեր առաքելությունը և խթանողի մեր դերն ենք կատարում այս գործընթացում, որը հետզհետե խարխլում ու ճեղքում է ներկա համակարգը, նրա անարդար, անազատ ու անիրավական հիմքերը և միաժամանակ հիմնադրում ու կերտում է նորը՝ այլընտրանքայինը, ազատ, արդար ու արժանապատիվ իրավական քաղաքացիական նոր Հայաստանը:

Մաշտոցի պուրակում մենք այլընտրանքներ ենք ստեղծում հանրային համակեցության, համագործակցության, երկրի տևական զարգացման տեսլականի, հանրային կառավարման և այլ հիմնահարցերի առնչությամբ, որոնք անհրաժեշտ են մեզ և ապագա սերունդներին լիարժեք, մարդավայել ու արժանապատիվ ապրելու համար:

Հայտարարում ենք նաև, որ այսօրվանից նպատակահարմար ենք համարում դադարեցնել գիշերային նստացույցը, սակայն շարունակելու ենք մեր ամենօրյա ներկայությունը և հերթապահությունը պուրակում: Ժամանակ առ ժամանակ իրականացվող շուրջօրյա նստացույցը նպատակ ունի մոբիլիզացնել մեր ուժերը, մեզ դարձնել ավելի կամային և տոկուն, մեր արմատական ու սկզբունքային տրամադրվածությունը փոխանցել հանրությանը և ժողովրդին:

Հաջորդ շաբաթվանից սկսած` մենք սկսելու ենք կազմակերպվել ու մոբիլիզացվել Երևանի, Թեղուտի, Քաջարանի, Ջերմուկի և այլ էկոլոգիական հիմնախնդիրների շուրջ:

Առաջիկայում մեր նախաձեռնություններն ու շարժումը առանձին և միասին հանդես կգան մի շարք ռազմավարական քայլերով ու ձեռնարկումներով, որոնց մասին ավելի մանրամասն կհայտարարվի շուտով:

Թեղուտի պաշտպանության քաղաքացիական նախաձեռնություն
«Մենք ենք այս քաղաքի տերը» քաղաքացիական նախաձեռնություն
«Մեր քաղաքը» հանրային-քաղաքացիական նախաձեռնություն
«Թռչկան» քաղաքացիական նախաձեռնություն
Մաշտոցի պուրակի նստացույցի մասնակիցներ