Երեկ վարչապետ Տիգրան Սարգսյանը հայտարարել է, թե «Հայաստանի շինարարության ոլորտում սպեկուլյատիվ մեծ միջոցներ կային, և երբ այդ փուչիկը պայթեց, բնականաբար, պահանջարկը նվազեց, և անկում եղավ»:

«ՉԻ» - Եկեք ապրիորի ընդունենք, որ վարչապետը սա ասել է սթափ վիճակում, և փորձենք հասկանալ: Ուրեմն, շինարարական բումը, որով այդքան պարծենում էր Քոչարյանը, սպեկուլյատիվ գումարներով է իրականացվել (եթե հիշում եք, վարչապետն էլ Սերժ Սարգսյանն էր): Հիմա ահա պարզվում է, որ դա փուչիկ էր և պայթեց:

Իսկ հիշո՞ւմ եք, թե Տիգրան Սարգսյանն ինչով էր զբաղված այդ «պայթյունի» օրերին: Ճիշտ է, շինարարությունը ոչ թե փուչիկ էր անվանում, այլ «համակարգաստեղծ ոլորտ», և պետության հաշվին շինարարական ընկերություններին հսկայական գումարներ էր նվիրում: Մինչդեռ նույնիսկ երեք տարեկան երեխան գիտի, որ պայթած փուչիկը հնարավոր չէ «սկոտչով» կպցնել:

Բայց սա, իհարկե, չի նշանակում, թե Տիգրան Սարգսյանն ինտելեկտով զիջում է երեք տարեկան երեխային: Պարզապես պետք է հետաքրքրվել, թե ում էին պատկանում այդ «սպեկուլյատիվ ֆինանսական միջոցները»: