Երևանի գլխավոր ճարտարապետ Նարեկ Սարգսյանը երեկ Մարզահամերգային համալիրում բացված «Շինարարություն և ինտերիեր-2012» մասնագիտացված ցուցահանդեսում առանձնացել էր վարչապետի շքախմբից, միայնակ էր մոտենում ու ծանոթանում ընկերությունների առաջարկներին:

«Հայացք»-ի թղթակիցը մի քանի հարց ուղղեց Երևանի գլխավոր ճարտարապետին:

- Պարոն Սարգսյան, Հյուսիսային պողոտայի ծրագրից հետո Երևանում կարծես շինարարությունը կանգ է առել, պողոտան էլ չի ամբողջացվում: Ո՞րն է շինարարության ծավալների անկման պատճառը:

- Ես մի հատ նայեմ, էլի, հա՞: Ինձ մի հարցրեք, քաղշիննախարարության փոխնախարար Ալավերդյան Ռուզաննային հարցրեք: (Քաղաքաշինության փոխնախարարը նույնպես մասնակցում էր ցուցահանդեսի բացմանը.- հեղ.):

- Ես Ձեզ եմ հարցս ուղղում, որովհետև Երևանի գլխավոր ճարտարապետը Դուք եք, ոչ թե տիկին Ալավերդյանը:

- Խնդիրը հիմնականում 2009 թվականի համաշխարհային ճգնաժամի հետ է կապված եղել: Հիմա շինարարության տեմպերը կամաց-կամաց աճում են: Քաղաքում բազմաթիվ ներդրումային ծրագրեր կան, որոնք մշակման փուլում են: Ոչ շատ ուշ՝ առաջիկա մեկ տարվա ընթացքում, տեղաշարժերը արդեն աչքով կերևան: Այնպես որ էդ խնդիրը արդեն, ինձ թվում է, անցյալում է:

- Պարոն Սարգսյան, նոր մշակույթ է ձևավորվել մայրաքաղաքում. շինարարները խաբում են բնակիչներին: Մի շարք նորակառույց շենքերում միևնույն խնդիրն է ծագել՝ բնակարանների բազմակի վաճառքի դեպքեր են գրանցվում, բնակիչների գումարները յուրացնում են, սակայն տները չեն կառուցում: Ինչո՞ւ է այս իրավիճակը ստեղծվել:

- Կառավարությունը ունի հիմա հանձնաժողով, որը ղեկավարում է ֆինանսների նախարարը: Դրա մեջ կան մի շարք նախարարներ, քաղաքապետարանից ներկայացուցիչներ: Եվ արդեն մեկ ամսից ավելի է էդ հանձնաժողովը բոլոր հարցերով մանրամասնորեն ակտիվ զբաղվում է: Եվ բնակիչներից էլ կան ներկայացուցիչներ, էնպես որ դա ուշադրության տակ է, և ես վստահ եմ, որ կլուծվեն էդ հարցերը:

- Հնարավո՞ր է, որ դա էլ է նպաստել շինարարության ծավալների անկմանը, որովհետև, փաստացի, մի շարք շենքեր կիսակառույց են, և շինարարությունը սառեցված է:

- Չէ, դա դրա հետ կապ չունի: Մի քանի, մեղմ ասած, անպասխանատու մարդկանց պատճառով չի կարող շինարարությունը կանգնել: Ես ինչքան գիտեմ՝ նրանցով իրավապահներն էլ են զբաղվում, քննություն է գնում էդ առումով, էնպես որ, ես վստահ եմ, որ էդ խնդիրները կլուծվեն:

Ռոզա Հովհաննիսյան