«Կան պատերազմում զոհված անձանց մասունքներ, որոնք այնքան վնասված են, որ անգամ այլ երկրներում էլ չի հաջողվի դրանց փորձաքննությունն անցկացնել։ Կա մոտ 210 փորձանմուշ, որոնց հետ շատ բարդ է աշխատել։ ԴՆԹ-ի միջոցով 2200-ից ավել մարմնի ճանաչում ունենք։ Այս պահին 180 ծնող սպասում է ԴՆԹ պատասխանի»,- այս մասին լրագրողների հետ զրույցում հայտնեց առողջապահության նախարարը։

Պատասխանելով լրագրողի հարցին՝ թե արդյոք Մեծամորում դիերը պահվում են «Սպայկա» ընկերության սառնարաններում, Անահիտ Ավանեսյանն ասաց, որ դրանք «Սպայկա»-ինը չեն, Մեծամորում կա դիահերձարան, որտեղ հատուկ սառնարաններում պահպանվում են մարմինները։ 

Կորոնավիրուսի համավարակի առնչությամբ նախարարը հայտնեց, որ այս պահին հիվանդներից 429-ը ծանր վիճակում է, 96-ը՝ ծայրահեղ ծանր, 30-ը միացված է թոքերի օդափոխության սարքերին։ 

Պատվաստումները փոքր քանակով սկսվել են բուժաշխատողների շրջանում, բայց նոր խմբաքանակ դեռ չի ստացվել։