Հայաստանի ֆուտբոլի ֆեդերացիայի նախկին նախագահ Ռուբեն Հայրապետյանի և վերջինիս որդու՝ Ռաֆիկ Հայրապետյանի գործով նախաքննությունը ոչ թե քննիչ Արթուր Այվազյանն, այլ, փաստորեն, վարչապետ Նիկոլ Փաշինյանի օգնական Աննա Վարդապետյանն է իրականացրել։ Այս մասին այսօր լրագրողների հետ զրույցում ասաց Հայրապետյանների փաստաբաններից Գեորգի Մելիքյանը՝ հիշեցնելով, որ մեղադրանքի ձևակերպումը բացառապես քննիչի լիազորությունն է, անգամ քննչական խմբի ղեկավարը չի միջամտում դրան։

Հիշեցնենք, որ 168.am-ը հրապարակել է տեսանյութ, որում Ռաֆիկ և Ռուբեն Հայրապետյանների վերաբերյալ մեղադրանքի տեքստն է։ Տեսանյութի աջ կողմում երևում է, որ մեղադրանքը խմբագրված է «Աննա Վարդապետյան» անուն ազգանունով օգտատիրոջ կողմից։

Ռաֆիկ և Ռուբեն Հայրապետյանի վերաբերյալ քրեական գործը վերաբերում է նրանց ընտանիքին պատկանող «Հարսնաքար» հյուրանոցային համալիրի գործադիր մարմնի ղեկավարի նկատմամբ առերևույթ կատարված ինքնիրավչության, նրան ազատությունից ապօրինի զրկելու, պարբերաբար ֆիզիկական ուժեղ ցավ և հոգեկան ուժեղ տառապանք պատճառելու ենթադրյալ դեպքին։

Հայրապետյանի պաշտպաններից Ամրամ Մակինյանն ասում է՝ հրապարակված տեսանյութից ակնհայտ է դառնում, որ մեղադրանքը խմբագրողը հենց Նիկոլ Փաշինյանի օգնական Աննա Վարդապետյանն է։

«Փաստորեն, քաղաքական իշխանությունը բարձրաձայն գոռում է, թե արդարություն, արդարադատություն է ուզում, բայց իրենք են միջամտում քաղաքական այսպիսի գործերին»,- ասաց Ամրամ Մակինյանը՝ նման գործելոճը անվանելով «մաֆիային բնորոշ»։ Պաշտպանը վստահ է, որ Աննա Վարդապետյանին այս գործին միջամտելու ցուցում Նիկոլ Փաշինյանն է տվել։

Նշենք, որ տեսանյութի հրապարակումից հետո Աննա Վարդապետյանը որևէ կերպ դրան չի արձագանքել։ Գլխավոր դատախազությունը մամուլի հրապարակումներն ուղարկել է Ազգային անվտանգության ծառայություն, երեկ հանցագործության մասին հաղորդում է ներկայացրել նաև պաշտպան Մակինյանը։ Այս պահին դեռևս հայտնի չէ դեպքի առթիվ քրեական գործ հարուցելու մասին։

Ամրամ Մակինյանն ասում է, որ տեսանյութի հրապարակումից անմիջապես հետո պետք է քրեական գործ հարուցվեր, առգրավվեին համակարգիչներ՝ հնարավորություն չտալով, որպեսզի ապացույցներ ոչնչացվեն։

Պաշտտպանը հարց է բարձրացնում՝ ինչպե՞ս են ծանոթացել քննիչն ու վարչապետի օգնականն ու նշում, այս իրենց՝ պաշտպաններն այս հարցի պատասխանն ակնկալում են ստանալ Քննչական կոմիտեի նախագահից։

Լուսանկարում՝ Ռուբեն Հայրապետյանը