Այս պահից մեկնարկում է մայիսի 6-ին կայանալիք խորհրդարանական ընտրությունների քարոզարշավը: Մինչև մայիսի 5-ը քաղաքական ուժերն ու 41 մեծամասնական ընտրատարածքներում առաջադրված թեկնածուները հանրությանը կներկայացնեն իրենց նախընտրական ծրագրերը:

Ինչպես հայտնի է, համամասնական ընտրակարգով Ազգային ժողովի ընտրություններին մասնակցում են 8 կուսակցություն և մեկ կուսակցությունների դաշինք:

Հայաստանի հանրապետական կուսակցության նախընտրական շտաբը ղեկավարում է ԱԺ նախկին նախագահ, պատգամավոր Հովիկ Աբրահամյանը: Կուսակցության կարգախոսն է՝ «Հավատանք, որ փոխենք»:

«Բարգավաճ Հայաստան» կուսակցության նախընտրական շտաբի ղեկավարը քաղաքաշինության նախարար Վարդան Վարդանյանն է: ԲՀԿ-ն ունի մի քանի կարգախոս՝«Միասին կառուցենք բարգավաճ երկիր», «Մեր խոսքը գործ է», «Հզոր պետություն, զարգացող տնտեսություն, բարեկեցիկ ընտանիք», սակայն այս ընտրություններին հիմնական կարգախոսը լինելու է՝ «Հավատա, վստահիր, պահանջիր»:

«Օրինաց երկիր» կուսակցության նախընտրական շտաբը ղեկավարում է ՕԵԿ փոխնախագահ, պատգամավոր Հեղինե Բիշարյանը: ՕԵԿ-ի նախընտրական կարգախոսն է՝ «Հավատանք, որ կառուցենք օրինաց երկիր»:

«Ժառանգություն» և «Ազատ դեմոկրատներ» կուսակցությունը ընտրություններին մասնակցում են մեկ միասնական ցուցակով: Նրանց միասնական շտաբը ղեկավարելու է «Ազատ դեմոկրատների» նախագահ Խաչատուր Քոքոբելյանը: Հիմնական կարգախոսն է՝ «Գալիս ենք…»: Ունեն նաև մի քանի այլ նշանաբան՝ «Միասին սարեր ենք շարժելու», «Միշտ ժողովրդի կողքին» և «Աշխատանք, ոչ թե ողորմություն»:

Հայ հեղափոխական դաշնակցության նախընտրական շտաբի ղեկավարը ԱԺ պատգամավոր Միքայել Մանուկյանն է, իսկ կուսակցության նախընտրական կարգախոսն է՝ «Ազատություն, արդարություն, դաշնակցություն»:

«Հայ ազգային կոնգրես» կուսակցությունների նախընտրական շտաբը ղեկավարելու է Լևոն Զուրաբյանը: Կարգախոսը լինելու է՝ «Ոչ մի ձայն հանցավոր ռեժիմին»:

Հայաստանի կոմունիստական կուսակցության նախընտրական շտաբը ղեկավարում է հենց կուսակցության առաջին քարտուղար Ռուբեն Թովմասյանը: ՀԿԿ-ի կարգախոսն է՝ «Կոմունիստների հաղթանակը ժողովրդի հաղթանակն է»:

Հայաստանի դեմոկրատական կուսակցության նախընտրական շտաբի ղեկավարումը վստահվել է կուսակցության նախագահության անդամ Լյուդմիլա Ազիզյանին: Կուսակցությունն ունի երկու կարգախոս՝ «Եթե արդարություն, ապա Դեմկուս» և «Ես մենք ենք»:

«Միավորված հայեր» կուսակցության նախընտրական շտաբը ղեկավարելու է կուսակության նախագահի տեղակալ Հովհաննես Հովհաննիսյանը: Այս կուսակցությունը որոշել է ընտրություններին գնալ միանգամից երեք կարգախոսով՝ «Ճշմարիտ սոցիալ-իրավական պետություն», «Կյանքի կոչենք ազգին ծառայող իրավունքի գերիշխանությունը» և «Հայեր, միացեք, միացեք իրավական երկրում»: