![](/static/articles/12/85/11/l-XLBGf4D3K7.jpg)
Հասան Ռոհանի. «Իրանում պահպանվում է կորոնավիրուսի չորրորդ ալիքի տարածման հավանականությունը»
Իրանի տարածքում շարունակում է պահպանվել կորոնավիրուսի չորրորդ ալիքի տարածման հավանականությունը։ Այդ մասին շաբաթ օրը՝ մարտի 13-ին հայտարարել է Իրանի նախագահ Հասան Ռոհանին։
«Չորրորդ ալիքի սպառնալիքը վերացված չէ, դրա հավանականությունը պահպանվում է։ Մինչ օրս մենք զգույշ էինք, որ խուսափենք նոր ալիքից, սակայն ցանկացած պահի այդ վտանգը կարող է իրականություն դառնալ»,- նշել է Ռոհանին։ Նրա ելույթը հեռարձակվել է Իրանի պետական հեռուստատեսությամբ։ Իրանի նախագահը հավելել է, որ առաջիկա շաբաթների ընթացքում Իրանում կմեծանան պատվաստումների տեմպերը։
2020 թվականի դեկտեմբերի 17-ին Ռոհանին հայտարարել էր, որ Իրանը հաղթահարել է կորոնավիրուսի տարածման երրորդ ալիքը։ 2021 թվականի փետրվարի 9-ին Իրանում սկսվել է ռուսական «Спутник V» պատվաստանյութով բնակչության կամավոր անվճար պատվաստումները։
Բացի այդ, փետրվարի 28-ին Իրանը ստացել է չինական Sinopharm ընկերության պատվաստանյութի առաջին խմբաքանակը, իսկ մարտի 11-ին՝ հնդկական Bharat Biotech ընկերության պատվաստանյութի 150 հազար դեղաչափ։ Նախատեսվում է, որ կորոնավիրուսի իրանական արտադրության պատվաստանյութը կսկսի կիրառվել արդեն այս տարվա ապրիլ ամսվանից։
Լուսանկարը՝ IRNA գործակալության
Մեկնաբանել