![](/static/articles/12/85/23/l-EX9AhI7SmP.jpg)
Հյուսիսային Կորեան անարձագանք է թողել Բայդենի վարչակազմի կողմից կապեր հաստատելու փորձերը
ԱՄՆ նախագահ Ջո Բայդենի վարչակազմին դեռևս չի հաջողվում դիվանագիտական ալիքներով կապ հաստատել Հյուսիսային Կորեայի իշխանությունների հետ։ Այդ մասին գրում է Reuters գործակալությունը։ Ինչպես պարբերականին հայտնել է Սպիտակ տան բարձրաստիճան աղբյուրը, որը նախընտրել է չբացահայտել ինքնությունը, Բայդենի վարչակազմը փետրվարի կեսերից փորձում է կապ հաստատել Հյուսիսային Կորեայի իշխանությունների հետ, այդ թվում նաև Փխենյանում ՄԱԿ-ի առաքելության միջոցով։ Այդուհանդերձ, փորձերը հաջողություն չեն ունեցել։
Reuters-ը գրում է, որ Հյուսիսային Կորեայի իշխանությունների կողմից շփման փորձերից հրաժարումը ամերիկյան կողմի մոտ մտահոգությունների առիթ է տալիս։ Պատճառներից մեկն էլ այն է, որ մարտի վերջին նախատեսվում է ԱՄՆ պետքարտուղարի այց Հարավային Կորեա և Ճապոնիա։ Գործակալության զրուցակցի խոսքերով՝ ԱՄՆ-ի և Հյուսիսային Կորեայի միջև ակտիվ շփումները դադարեցվել են գրեթե մեկ տարի առաջ՝ Դոնալդ Թրամփի նախագահության շրջանում։ Աղբյուրը չի նշել, թե ինչն է դարձել շփումների դադարեցման պատճառ։
2018 թվականին Դոնալդ Թրամփը դարձել էր ԱՄՆ առաջին նախագահը, որը հանդիպել էր Հյուսիսային Կորեայի առաջնորդի հետ։ Հունիսի 30-ին կայացած հանդիպումից առաջ և հետո նշվում էր երկու երկրների հարաբերությունների նոր փուլի մասին։ Ջո Բայդենն իր նախընտրական քարոզարշավի ժամանակ հայտարարել էր, որ Հյուսիսային Կորեայի առաջնորդի հետ կհանդիպի միայն այն դեպքում, երբ ԿԺԴՀ-ն կհամաձայնվի միջուկային զինաթափման։ 2021 թվականի հունվարին ԱՄՆ նախագահի պաշտոնը զբաղեցնելուց հետո՝ Բայդենի վարչակազմը դեռևս չի հայտարարել, թե ինչպիսին կլինի ամերիկյան քաղաքականությունը Հյուսիսային Կորեայի նկատմամբ։
Լուսանկարները՝ Reuters գործակալության
Մեկնաբանել