Թուրքիան հերթական անգամ հայտարարել է Ղրիմի անօրինական բռնազավթման անթույլատրելիության մասին, որը համարվում է միջազգային իրավունքի նորմերի կոպիտ խախտում։ Անկարան աջակցում է Ուկրաինայի տարածքային ամբողջականությանը և ինքնիշխանությանը։ Այդ մասին նշվում է Թուրքիայի արտաքին գործերի նախարարության հայտարարության մեջ, որը կապված է Ղրիմի թերակղզու Ռուսաստանի կողմից բռնակցման յոթամյակի հետ։

Հայտարարության մեջ նշվում է, որ 2014 թվականի մարտի 16-ին Ղրիմի Ինքնավար Հանրապետությունում իրականացվել է անօրինական հանրաքվե, որի արդյունքներն օգտագործվել են որպես Ղրիմի բռնազավթման պատրվակ։

«Թուրքիան կարևորել և կարևորում է Ղրիմի թաթարների անվտանգությունը, բարեկեցությունը և մշակութային ինքնության պահպանումը, որոնք Ղրիմի թերակղզում բնիկ ազգերից են»,- նշվում է հայտարարության մեջ։ Թուրքիայի արտաքին քաղաքական գերատեսչությունը նաև ընդգծել է, որ ուշադրությամբ հետևում է Ղրիմում տեղի ունեցող գործընթացներին։

Լուսանկարը՝ Anadolu գործակալության